Венгрия ва Словакия Алишер Усмоновга қўйилган санкцияларни бекор қилишни талаб қилмоқда
Венгрия ва Словакиянинг талаблари Европа Иттифоқида Россияга қарши санкциялар бўйича қарор қабул қилиш жараёнини мураккаблаштирди.
Венгрия ва Словакия Россиялик тадбиркорлар Алишер Усмонов ҳамда Михаил Фридманни Европа Иттифоқининг санкциялар рўйхатидан чиқаришни талаб қилмоқда.
Санкциялар муҳокамаси кечиктирилди
«Euractiv» нашри манбаларига таяниб хабар беришича, ушбу талаблар сабаб Европа Иттифоқи дипломатлари Россияга қарши айрим санкцияларни узайтириш масаласини кўриб чиқишни 15-мартга қадар қолдирган.
Маълум қилинишича, Будапешт ва Братиславанинг позицияси санкциялар бўйича музокараларни мураккаблаштирган. Европа Иттифоқи доирасида Россияга қарши чеклов чораларини узайтириш бўйича қарор аввалроқ қабул қилиниши керак эди, аммо икки давлатнинг талаблари сабабли муҳокама кечиктирилмоқда.
Словакиянинг позицияси
Словакия ташқи ишлар вазири Юрай Бланар 12-март куни Братислава Усмонов, Фридман ва яна бир қатор шахсларни санкциялар рўйхатидан чиқариш масаласини кўриб чиқаётганини тасдиқлади. Унинг таъкидлашича, музокаралар ҳали якунига етмаган ва қарор ҳуқуқий далиллар асосида қабул қилинади. Бланарнинг айтишича, агар тақдим этилган далиллар ишончли ва мустаҳкам ҳуқуқий асосга эга бўлса, Словакия конструктив хулосага келишга тайёр.
Венгриянинг аввалги талаблари
Венгрия бу масалани аввал ҳам кўтарган. Мамлакат ташқи ишлар вазири Пётр Сийярто 2025-йилдаёқ Усмонов ва Фридманга нисбатан жорий этилган санкцияларни қайта кўриб чиқиш таклифини билдирган эди. «Financial Times» маълумотига кўра, Будапешт аввалроқ ҳам Фридман санкциялар рўйхатидан чиқарилмаса, Россияга қарши чекловларни узайтиришга тўсқинлик қилиш билан таҳдид қилган.
«Дружба» нефт қувури атрофидаги баҳс
Шу билан бирга, Венгрия ва Словакия Европа Иттифоқининг Россияга қарши 20-санкциялар пакети бўйича келишувига ҳам тўсқинлик қилаётгани айтилмоқда. Бу ҳолат «Дружба» нефть қувури орқали нефт етказиб бериш тўхтаб қолган бир пайтга тўғри келди.
Киев ушбу қувурдаги таъмирлаш ишлари сабаб нефт узатиш вақтинча тўхтатилганини маълум қилган. Венгрия эса қувур ҳолатини текшириш учун ўз мутахассисларига объектни кўздан кечириш имкони берилишини талаб қилмоқда.
