Хоразмда Урганч—Хива йўналишида пулли йўл қурилади

Хоразм вилоятида транспорт инфратузилмасини тубдан яхшилаш доирасида Урганч—Хива йўналишида янги пулли автомобиль йўли қурилиши режалаштирилмоқда. Бу ҳақда Хива ҳокимлиги матбуот хизмати маълум қилди. Лойиҳа ҳудудлараро қатновни тезлаштириш ва йўл инфратузилмасини замонавий талаблар асосида янгилашга қаратилган.

Лойиҳа ҳақида

Қайд этилишича, янги трассанинг умумий узунлиги 32 километрни ташкил этади. У мавжуд йўналишларга муқобил сифатида қурилиб, транспорт оқимини қайта тақсимлаш имконини беради. Йўл ишга туширилиши орқали ҳаракат хавфсизлиги ошиши, сафар вақти қисқариши ва тирбандликлар камайиши кутилмоқда. Йўл тўлиқ фойдаланишга топширилгандан сўнг ундан пулли асосда фойдаланилади.

Маълумотларга кўра, янги автомобил йўли Урганч шаҳри ҳудудидан бошланиб, айланма йўналиш орқали Хива шаҳрига туташади. Бу ечим транзит транспорт воситаларини аҳоли зич яшайдиган ҳудудлардан четлатиш, мавжуд йўллардаги юкламани камайтириш ва логистика жараёнларини яхшилашга хизмат қилади.

Лойиҳа имкониятлари

Мутахассислар таъкидлашича, трассанинг пулли асосда қурилиши унинг доимий сақланиши, ўз вақтида таъмирланиши ва хизмат кўрсатиш сифати юқори бўлишини таъминлайди. Бу эса узоқ муддатда йўл инфратузилмасининг барқарор ишлашини кафолатлайди.

Янги трасса UNESCO Жаҳон мероси рўйхатига киритилган Хива шаҳрига олиб бориши билан ҳам аҳамиятли ҳисобланади. Саёҳат вақти қисқариши орқали ички ва ташқи туризм оқими ошиши, шу билан бирга ҳудуд иқтисодиётига қўшимча даромад кириши кутилмоқда.

Эслатиб ўтамиз, аввалроқ Тошкент–Андижон йўналишида барпо этиладиган пулли автомобил йўли тўлиқ масофани 2 соат 14 дақиқада босиб ўтиш имконини бериши ҳақида хабар бергандик.