Европа раҳбарлари Россия нефт секторини «бўғиш»га ваъда берди — Politico
Британия бош вазири Кир Стармер Россия нефт ва газини дунё бозоридан чиқаришни мақсад қилган янги Европа ташаббусини эълон қилди.
Politico нашри маълумотларига кўра, Британия бош вазири Кир Стармер Европа иттифоқчилари билан биргаликда Россиянинг нефт секторини чеклаш ва уни халқаро бозордан сиқиб чиқариш бўйича қатъий чоралар кўришга келишди. Бу қарор АҚШ президенти Доналд Трампнинг «Роснефт» ва «Лукойл»га қарши жорий этган санкцияларидан кейин қабул қилинди.
Лондонда бўлиб ўтган учрашувда Стармер Украина президенти Володимир Зеленский, НАТО бош котиби Марк Рютте, Дания бош вазири Мэтте Фредериксен ва Нидерландия бош вазири Дик Схооф билан музокаралар ўтказди. Учрашувга Япония ҳам биринчи марта виртуал равишда қўшилди. Асосий мавзулардан бири Путинни музокара столига ўтқазиш учун иқтисодий босимни кучайтириш бўлди.
НАТО бош котиби Марк Рютте таъкидлаганидек, АҚШнинг йирик рус нефт компанияларига қарши санкциялари Кремлни молиявий манбаларидан маҳрум қилиб, босимни кескин кучайтиради. «Путин учун бу иқтисодий фожиага айланиши мумкин», — деган у.
Учрашувда Зеленский икки асосий мақсадни белгилади: Трамп санкцияларидан максимал фойда олиш ва узоқ масофали ракета қуроллар масаласини музокаралар кун тартибида сақлаб қолиш. Манбалардан бирининг таъкидлашича, ҳозирча Путинга яқин деб ҳисобланадиган «Сургутнефтегаз» компанияси санкция рўйхатига кирмаган, аммо уни қамраб олиш Кремлга бўлган босимни янада оширади.
Британия расмийларидан бири буни «Трамп сиёсатидаги жиддий бурилиш», деб атади. Уларга кўра, АҚШнинг санкциялари ва Европанинг умумий позицияси Россияни нефт экспортидан кескин чеклаб, урушни тўхтатиш йўлида катта босим воситасига айланади.
Politico нашрининг таъкидлашича, Трамп аввал Европа Россия нефт ва газидан воз кечмагунча янги санкциялар жорий этмаслигини айтган эди, аммо энди «вақт келганини ҳис қилди».
НАТО бош котиби Марк Рютте эса Трамп ва Зеленскийнинг охирги музокараларини «самарали ва кутилган даражада муваффақиятли», деб баҳолади. Унинг сўзларига кўра, АҚШ ва Европа ўртасидаги янги мувофиқлашув Россияни тинчлик музокараларига мажбур этиши мумкин.
