Аляскадаги музокаралар Путинни Трамп урушга аралашмаслигига ишонтирган — Bloomberg

15 август куни Аляскада Доналд Трамп билан бўлиб ўтган учрашув Россия президенти Владимир Путинни АҚШ урушга жиддий аралашмайди, деган фикрга келтирди. Bloomberg манбаларига кўра, Путин шундан сўнг эскалацияни кучайтиришга қарор қилган ва бу билан Киевни Кремл шартлари асосида музокараларга мажбурлашни мақсад қилган. Учрашувдан олдин Украинани узоқ масофадан ўққа тутиш камайган бўлса, кейинги бир ойда бу ҳужумлар 46 фоизга ошган. Украина ҳарбий ҳаво кучлари маълумотларига кўра, сентябрнинг биринчи ярмида Россия 3500 дрон, 190 ракета ва 2500 дан ортиқ бомба қўллаган. Лондондаги Gatehouse Advisory Partners компанияси таҳлилчиси Вита Спивак таъкидлашича, Путин бу орқали Трамп ва Европа иттифоқчиларига ҳали ҳам урушни бошқара олишини намойиш этмоқчи. «У ўз позициясини кейинги музокаралар олдидан мустаҳкамламоқда», деди Спивак. Bloomberg манбалари Путин Ғазодаги урушни кузатаётганини ва уни Украинадаги вазиятдан ҳам «қаттиқроқ» деб ҳисоблашини айтмоқда. Унга кўра, Ғазодаги урушни АҚШ ва Европа қабул қилгани, Москвага нисбатан уларнинг танқидини беэътибор қилади. Аляскадаги учрашувда Путин урушни тўхтатиш ва фронтни мустаҳкамлашни таклиф қилган. Унинг шарти — Украина Донецк ва Луҳанскнинг айрим ҳудудларидан воз кечиши, Қўшинлар сонини қисқартириши ва НАТОга киришдан воз кечиши бўлган. Шу билан бирга, сўнгги кунларда Трамп Путиннинг ҳаракатларидан норози эканини билдириб, Россия ва унинг иттифоқчиларига нисбатан санкцияларни кучайтириш ғоясини илгари сурди. Аммо у Европанинг Москвага нисбатан аввал қадам ташлашини талаб қилмоқда.