АҚШ–Эрон кескинлиги хавотирлари фонида нефт нархи ошди

Бугун, 12 феврал тонгида нефт нархлари бироз кўтарилди. Инвесторлар АҚШ ва Эрон ўртасидаги кескинлик кучайиши мумкинлигидан хавотирда, чунки Теҳронга ёки денгиздаги юк ташиш йўлларига ҳар қандай ҳужум таъминот узилишларига олиб келиши мумкин. Бу ҳақда «Reuters» хабар берди.

«Brent» маркали нефт фючерслари 27 центга, яъни 0,39 фоизга ошиб, баррели 69,67 долларга етди. АҚШнинг «West Texas Intermediate» (WTI) нефти эса 29 центга, ёки 0,45 фоизга кўтарилиб, баррели 64,92 долларни ташкил этди.

11 феврал куни ҳар икки эталон ҳам юқорироқ ёпилди. «Brent» фючерслари 0,87 фоизга, WTI эса 1,05 фоиздан ортиққа ўсди. Бу АҚШдаги нефт захиралари ошганига қарамай, инвесторларнинг АҚШ–Эрон муносабатларидаги кескинликка оид хавотирлари устун келгани билан изоҳланади.

АҚШ президенти Доналд Трамп 11 феврал куни Исроил бош вазири Бинямин Нетаняҳу билан ўтказилган музокаралардан сўнг, Эрон бўйича кейинги қадамлар юзасидан «аниқ» келишувга эришилмаганини айтди, бироқ Теҳрон билан музокаралар давом этишини таъкидлади.

10 феврал куни эса Трамп, агар Эрон билан келишувга эришилмаса, Яқин Шарққа иккинчи авианосецни юбориш имконини кўриб чиқаётганини билдирди. Бу пайтда Вашингтон ва Теҳрон музокараларни қайта бошлашга тайёрланаётган эди.

АҚШда нефт захиралари ошди

Ўтган ҳафта АҚШ ва Эрон дипломатлари Уммонда билвосита музокаралар ўтказди. АҚШ–Эрон ўртасидаги навбатдаги музокаралар санаси ва жойи ҳали эълон қилингани йўқ.

IG таҳлилчиси Тони Сайкаморнинг айтишича, WTI учун 65–66 доллар даражасидан барқарор юқори чиқиш Яқин Шарқдаги янада кучли кескинликни талаб қилади, аксинча, вазият юмшаса, фойдани қайд этиш тезда нархларни 60–61 доллар атрофига қайтариши мумкин.

АҚШ Меҳнат вазирлиги маълумотларига кўра, январ ойида мамлакатда иш ўринлари сони кутилмаган даражада тез ўсди, ишсизлик даражаси эса 4,3 фоизга тушди. Бу иқтисодиёт соғлом эканини кўрсатади.

«Барқарор АҚШ иқтисодиёти нефтга бўлган талаб бўйича кутилмаларни ҳам қўллаб-қувватламоқда», – деди «China Futures» компаниясининг энергетика ва кимё соҳалари бўйича бош тадқиқотчиси Минюй Гао.

Шу билан бирга, АҚШда нефт захираларининг кескин кўпайиши нархлар ўсишини чеклади. Энергетика ахборот маъмурияти (EIA) маълум қилишича, ўтган ҳафта АҚШ нефт захиралари 8,5 миллион баррелга ошиб, 428,8 миллион баррелга етди. Бу «Reuters» сўровидаги таҳлилчилар кутган 793 минг барреллик ўсишдан анча юқори.

«Бироқ йил бошидан бери жаҳон нефт захиралари бўйича ўсиш, одатда, кутилганидан паст бўлмоқда, шунингдек, хорижий нефт фючерслари ва опционларидаги «нетто узун позициялар» ҳали ортиқча оғир даражага етмаган», – деди Гао.

Унинг айтишича, нефт нархлари юқори томонга мойил бўлиб қолиши мумкин, бунда АҚШ–Эрон вазияти, Россия нефтига нисбатан санкцияларнинг кучайиши ва экспорт қисқариши бўйича кутилмалар қўллаб-қувватловчи омил бўлиб хизмат қилади.