АҚШда Миграция полициясига қарши исён авж олди — фотожамланма
Американинг 43 та штатида Миграция ва божхона полициясининг шафқатсизлигига қарши оммавий намойишлар қайта авж олди. Унга мигрантларга ёрдам беришга уринган икки кишининг ўқ еб, вафот этгани туртки бўлган.
АҚШда миграция полициясининг хатти-ҳаракатларидан норози бўлган минглаб аҳоли яна кўчаларга чиқди. Бу сафарги намойишга федерал судя Кэтрин Менендеснинг Миннесотада ўтказилаётган «Metro Surge» куч ишлатиш операциясини тўхтатиш ҳақидаги талабни рад этгани сабаб бўлди.
Қонли рейдлар ва қурбонлар
Норозилик тўлқини шунчаки пайдо бўлгани йўқ. Бунга миграция полициясининг рейдлари пайтида кўп болали она Рене Гуд (7 январ) ва тиббиёт ходими Алекс Претти (24 январ)нинг отиб ўлдирилиши сабаб бўлган. Маълумотларга кўра, улар мигрантларга ёрдам беришга уринганида полиция томонидан ўққа тутилган. Шунингдек, 5 ёшли боланинг ҳибсга олиниши аҳоли орасида кескин норозилик ва нафратни уйғотди.
«Иш йўқ, ўқиш йўқ, харид йўқ!»
Кўплаб намойишчилар кўчаларга «Тўхтатинг» деган плакатлар ҳамда Алекс Претти ва Рене Гуднинг суратлари билан чиқишган. CNN маълумотларига кўра, АҚШнинг 43 та штатида 200 дан ортиқ акциялар бўлиб ўтган. Намойишчилар нафақат кўчаларга чиқишди, балки оммавий бойкот эълон қилишган:
— Тадбиркорлар кафе ва дўконларини ёпди;
— Ишчилар сменаларга чиқишдан бош тортди;
— Талаба ва ўқувчилар дарсларни қолдирди.
Миннеаполис соҳилларида одамлар ўз таналари билан улкан «SOS» ёзувини ҳосил қилиб, федерал ҳукуматдан ёрдам ва адолат сўрашди. Протест рамзи сифатида Америка байроғи тескари ҳолатда кўтарилди.
Ҳукумат икки ўт орасида
Доналд Трамп маъмурияти полиция ҳаракатларини «инструкцияга мувофиқ» ва «фидокорона кураш» деб баҳоламоқда. Аммо маҳаллий ҳокимият органлари, хусусан, Миннеаполис мэри Жейкоб Фрей суд қароридан қаттиқ хафа эканини билдирди.
Аксарият намойишлар тинч ўтган бўлса-да, Лос-Анжелес ва Миннесотада вазият кескинлашган. Лос-Анжелесда полиция намойишчиларни тарқатиш учун кўзни ёшлантирувчи газдан фойдаланган. Прокуратура эса фаолларни черковга ҳужум қилишда айбламоқда.
Ҳозирда чегара хизмати раҳбари Том Хоман полициянинг ҳамма ҳаракатлари ҳам тўғри бўлмаганини тан олиб, агентлар сонини қисқартириш режасини кўриб чиқмоқда.
