АҚШлик сенатор Трампни Украинага «Tomahawk» беришга чақирди
Линдси Грэҳэмнинг фикрича, Россиянинг тунги ёпирилма зарбаси Вашингтон босимининг самара бермаётганини кўрсатди.
Россия томонидан 3 феврал тунида Украинага ёпирилма ракета ва дрон ҳужумидан сўнг АҚШ сенатори Линдси Грэҳэм Доналд Трампни узоқ масофали «Tomahawk» ракеталарини тақдим Киевга этиш жараёнини бошлашга чақирди. Унинг таъкидлашича, бундай қарор фронтдаги вазиятни жиддий ўзгартириши мумкин.
Республикачилар партиясининг таъсирли вакилларидан бири бўлган Грэҳэм «X» ижтимоий тармоғидаги чиқишида Россия президенти Владимир Путинга нисбатан мавжуд босим усуллари натижа бермаётганини билдирди. Сенатор Россиянинг Украинага қарши оммавий зарбалари музокараларга мажбурлаш сиёсати ишламаётганининг яққол далили эканини қайд этди.
Унинг сўзларига кўра, Путинни тўхтатиш учун иқтисодий ва ҳарбий босимни кескин кучайтириш талаб этилади. Айниқса, Украинага юқори аниқликка эга, узоқ масофали қурол-яроғ етказиб бериш ҳал қилувчи омил бўлиши мумкин.
Иқтисодий босим сиёсати
Сенатор Трамп маъмурияти илгари сурган нефт санкциялари сиёсатига алоҳида эътибор қаратди. У АҚШ ва Европа Россия нефтини сотиб олаётган давлатларга босимни ошириши кераклигини таъкидлади.
«Президент Трамп нефт компаниялари ва қайта ишлаш заводларини нишонга олиш орқали Путин иқтисодиётини заифлаштирди», — деб ёзди Грэҳэм. У Ҳиндистонга нисбатан жорий этилган бож тарифларини мисол қилиб келтириб, бу чора Россия нефти харидининг қисқаришига олиб келганини билдирди.
Грэҳэмнинг фикрича, агар йирик харидорлар Россия нефтидан воз кечса, урушни молиялаштириш имкониятлари кескин чекланади. Бу эса Москва учун стратегик босимни кучайтиради.
«Tomahawk» омили
Сенатор Украинага «Tomahawk» ракеталарини бериш чақириғини очиқ илгари сурди. Унинг таъкидлашича, бу қуроллар Россиянинг чуқур орқа ҳудудларидаги ҳарбий инфратузилмасига зарба бериш имконини яратади.
Грэҳэм музокаралар фақат Украина эркин, мустақил ва барқарор давлат сифатида сақланиб қолган тақдирдагина халқаро хавфсизликка хизмат қилишини қайд этди. У «вақт ҳал қилувчи аҳамиятга эга» эканини алоҳида урғулади.
