Банкларнинг молиявий кўрсаткичлари қандай?

SNS Ratings агентлиги Ўзбекистондаги банклар, микромолия ташкилотлари, ломбардлар, суғурта компаниялари ва қимматли қоғоз эмитентларининг кўрсаткичлари ҳақида таҳлилий маълумот тақдим қилди.

Таҳлил 2023 йил 4-чорагидан 2025 йил 3-чорагигача бўлган даврни ўз ичига олади. Унда бозор иштирокчиларини солиштириш имконияти бор.

Банклар орасида активлар бўйича «Миллий банк», «Агробанк», «SQB», «Асакабанк» ва «Капиталбанк» етакчилик қилган. Бу бешта банкнинг жами капитали бозордаги улушнинг ярмидан кўпини ташкил қилади.

2023 йилдан бери банкларнинг жами активи 650,7 трлн сўмдан 868,8 трлн сўмгача ўсган. Бунда ўсиш кўрсаткичи 33 фоиздан юқори.

Депозитлар бўйича ҳам «Миллий банк» биринчи ўринда. «Капиталбанк» ва «Агробанк» кучли учликни якунлаб берган. 2025 йил III чорак якуни бўйича банкларнинг жами депозит портфели 350 млрд сўмдан ошган.

Устав капитали бўйича ТОП-10 банклар

Солиштирилаётган даврда банкларнинг устав капитали 67,6 трлн сўмдан 91,5 трлн сўмгача ўсган. Бунда «Миллий банк», «Агробанк» ва «Халқ банки» етакчи бўлса, кучли ўнликдан нисбатан янги бўлишига қарамасдан «TBC Bank» ҳам жой олган.

Бундан ташқари, сайтда бошқа ташкилотлар кўрсаткичлари билан ҳам танишиш мумкин. Масалан, ломбардлар орасида «Олтин Ломбард» аксарият йўналишларда етакчи. Суғурта компаниялари орасида эса Apex Insurance яққол биринчи ўринда.

2025 йил бўйича банкларда молиявий натижалар

Ўтган йилда банк тизимининг жами активлари 924,7 трлн сўмни, капитали эса 135,4 трлн сўмни ташкил этди. Кредит портфели 604 трлн сўмгача, депозит портфели 417,3 трлн сўмгача ўсди.

Бу кўрсаткичларда давлат банкларининг улуши юқорилигича қолмоқда. 35 та банкдан 9 таси давлат банки бўлса, активларнинг 63 фоизи, кредитларнинг 67 фоизи, капиталнинг 60 фоизи, депозитларнинг 51 фоизи шу 9 та давлат банкига тўғри келмоқда.

Банкларнинг умумий соф фойдаси 2025 йилда 15,5 трлн сўмга (1,2 млрд доллар) етди ва бу ўтган йилнинг мос даврига нисбатан 123 фоизга кўп бўлди.

«Миллий банк» 2025 йил якунлари бўйича Ўзбекистон банклари орасида энг кўп фойда олган банк сифатида ҳам қайд этилган. Банк йил давомида 1,9 трлн сўм фойда олган.

Иккинчи ўринни 1,88 трлн сўм билан «SQB» (+576,9 млрд сўм) эгаллаган. «Капиталбанк» (+632,4 млрд сўм) эса 1,79 трлн сўм фойда олиб, кучли учликни ёпиб берган.

Шу билан бирга, муаммоли кредитлар улуши ўтган йилдаги 4 фоиздан 3 фоизгача камайди. Бу кредит портфели сифатининг яхшиланаётганини кўрсатади.

Аввалроқ ўзбекистонликлар қайси банкларга пулларини кўпроқ ишонаётгани ҳақида маълумот бергандик. Бу борада «Капиталбанк» биринчи ўринни олганди.