Бир нечта банклар битта йирик мижозга биргаликда кредит бериши тартиби тасдиқланди
Янги низом билан банклар иштирокида йирик лойиҳаларга синдикатлашган кредитлар ажратишнинг ҳуқуқий механизмлари аниқ белгилаб берилди.
Ўзбекистонда банклар томонидан синдикатлашган кредитларни ажратиш тартиби расман белгиланди. Адлия вазирлиги томонидан «Банклар томонидан синдикатлашган кредитларни ажратиш тартиби тўғрисида»ги низом давлат рўйхатидан ўтказилди.
Низомга мувофиқ, синдикатлашган кредит — бу қарз олувчини биргаликда молиялаштириш мақсадида бир нечта молия институтлари томонидан ажратиладиган кредит ҳисобланади. Бундай механизм, одатда, йирик инвестиция лойиҳаларини молиялаштиришда таваккалчиликни бир нечта иштирокчи ўртасида тақсимлаш имконини беради.
Банк синдикати иштирокчиси сифатида тижорат банклари билан бир қаторда хорижий банклар, халқаро молия ташкилотлари, шунингдек, ўз давлати қонунчилигига мувофиқ кредит ажратиш ҳуқуқига эга бўлган чет эл юридик шахслари ҳам қатнашиши мумкин. Бу эса халқаро молия ресурсларини жалб этиш имкониятларини кенгайтиради.
Низомда белгиланишича, синдикатлашган кредит олиш истагида бўлган қарз олувчи аввало банкка тегишли ариза билан мурожаат қилади. Банк аризани кўриб чиқиб, синдикатлашган кредит ажратиш мумкинлиги тўғрисида қарор қабул қилган тақдирда, қарз олувчи билан кредитнинг дастлабки шартларини келишиб олади.
Шундан сўнг етакчи иштирокчи сифатида белгиланган банк синдикатда қатнашиши мумкин бўлган потенциал иштирокчиларга қарз олувчи ҳақидаги асосий маълумотларни ўз ичига олган расмий таклифни юборади. Ушбу таклиф иштирокчиларнинг лойиҳада қатнашиш бўйича қарор қабул қилиши учун асос бўлиб хизмат қилади.
Банк синдикати синдикат иштирокчилари ўртасида тузиладиган ёзма келишув асосида шакллантирилади. Мазкур келишувда иштирокчилар ўртасидаги ўзаро муносабатлар, ҳуқуқ ва мажбуриятлар, шунингдек, кредит бериш шартлари аниқ белгилаб қўйилади.
Маълумот учун, банклар томонидан синдикатлашган кредит — бу бир эмас, бир нечта банклар бирлашиб битта йирик мижозга биргаликда кредит беришидир. Яъни, агар кредит жуда катта суммада бўлса ва битта банк учун хатарли ёки оғир бўлса, бир неча банк “синдикат” бўлиб, кредитни бўлиб-бўлиб беради.
