Болгария Путин самолёти учун Европа осмонида махсус коридор ажратишга тайёрлигини билдирди
Болгария Ташқи ишлар вазири Георг Георгиев Россия президенти самолёти учун НАТО осмонидан ўтишга рухсат беришни «мантиқий ва зарур қадам» деб атади.
Болгария ҳукумати Россия президенти Владимир Путиннинг самолёти Будапештдаги Доналд Трамп билан учрашувга бориши учун ҳаво йўлидан фойдаланишига рухсат беришга тайёрлигини билдирди. Бу ҳақда мамлакат ташқи ишлар вазири Георг Георгиев Люксембургда бўлиб ўтган халқаро ишлар бўйича Кенгаш мажлисида маълум қилди, деб ёзади Blitz агентлиги.
Вазирнинг сўзларига кўра, бу қарор «Украинада тинчликка эришиш учун муҳим дипломатик имконият яратиш» мақсадини кўзлайди.
«Қандай қилиб учрашув ўтказиш мумкин, агар иштирокчилардан бири унга етиб бора олмаса?» — деди Георгиев.
Шу билан бирга, қўшни Руминия ҳозирча Россия томонидан расмий парвоз сўровини олмаганини маълум қилди. Бу ҳақда Люксембургдаги Европа Иттифоқи Кенгашига келган Руминия ташқи ишлар вазири Оана Цою баёнот берди.
Бироқ вазиятни мураккаблаштираётган омиллар ҳам бор: Европа Иттифоқининг амалдаги санкциялари Россия давлат самолётларига, жумладан президентлик Ил-96 лайнерига, Европа осмони орқали парвоз қилишни тақиқлайди.
Бундан ташқари, 2023 йил март ойида Халқаро жиноят суди Путинга нисбатан ордер бергани сабабли Рим статутига қўшилган давлатлар унинг самолётини мажбурий қўндириш имкониятига эга бўлиши мумкин.
Шу сабабли, агар Болгария рухсат берса ҳам, Путиннинг Будапештга парвози Европа осмонидаги сиёсий ва ҳуқуқий зиддиятлар фонида ўта хавфли дипломатик миссияга айланиши мумкин.
