Чекловларга қарамай «Telegram» Россияда энг оммабоп мессенжерга айланди
«Роскомнадзор» томонидан секинлаштирилаётганига қарамай, 2026-йил январ ойида «Telegram» Россияда фойдаланувчилар сони бўйича илгарироқ блокланган «WhatsApp»ни ортда қолдириб, биринчи ўринга чиқди.
«Okkam» таҳлилчиларининг «Mediascope» маълумотларига таяниб хабар беришича, январ ойида «Telegram»нинг бир ойлик фаол фойдаланувчилари сони 95,9 млн нафарга етди, деб ёзмоқда «Forbes Russia». Шу билан бирга, «WhatsApp» аудиторияси 89,4 млн кишини ташкил этди. Феврал ойида «Роскомнадзор» чекловларни кучайтиргани сабабли Павел Дуров асос солган мессенжер фойдаланувчилари сони бироз (286 мингга) камайган бўлса-да, «WhatsApp»да кескин пасайиш кузатилди — унинг аудиторияси бир ойда 9,1 млн кишига қисқариб, 80,3 млнга тушиб қолди.
Давлат томонидан фаол тарғиб қилинаётган «VK» корпорациясининг «Max» мессенжери эса учинчи ўринни эгаллаб турибди. Феврал ойида унинг фойдаланувчилари сони 73,7 млндан 77,5 млн нафаргача кўпайди. Мутахассисларнинг таъкидлашича, «Telegram»ни секинлаштириш чоралари мессенжер қамровига атиги 2 фоиз салбий таъсир кўрсатган, холос.
Реклама бозори
Чекловлар «Telegram»даги реклама кампаниялари самарадорлигига жиддий таъсир кўрсатмади. Аксинча, мессенжер феврал ойи ўрталаридан бошлаб реклама кўрсатувларининг минимал нархини (floor price) 30 фоизга арзонлаштирди. «Okkam» экспертларининг қайд этишича, 2025-йил якунларига кўра, «Telegram Ads» тизимидаги реклама ҳажми қарийб 30 фоизга ўсган.
«Роскомнадзор» 9–10-феврал кунлари мессенжерни секинлаштиришни кучайтирган эди. Натижада фойдаланувчилар медиафайлларни юклашда муаммоларга дуч кела бошладилар. Регулятор агар мессенжер ўз серверларини Россия ҳудудига жойлаштирмаса ва террорчиликка қарши кураш қонунчилиги талабларини бажармаса, чекловлар давом этишини билдирган.
Тўлиқ блокировка хавфи
Яқин истиқболда «Telegram»нинг Россиядаги тақдири ноаниқлигича қолмоқда. «РБК» ва «The Bell» нашрларининг Кремлга яқин манбаларга таяниб хабар беришича, 2026-йил 1-апрелдан бошлаб мессенжер Россия ҳудудида тўлиқ блокланиши мумкин.
Маълумотларга кўра, фақат Украинадаги ҳарбий ҳаракатлар зонасида алоқа ва мувофиқлаштириш учун истисно қилиниши кутилмоқда. Ушбу кескин чоралар фонида фойдаланувчиларнинг маҳаллий «Max» мессенжерига ўтиш суръати янада тезлашиши прогноз қилинмоқда.
