Давлат бошқарувидаги энг намунали вазирлик ва ходимлар маълум қилинди

«Сифатли давлат бошқаруви» дастури доирасида 40 та республика идораси ва уларнинг ходимлари иштирок этган танлов натижалари эълон қилинди.

Ғолиблар

Танлов натижаларига кўра, Адлия вазирлиги «Ўзбекистон – 2030» стратегиясини амалга ошириш бўйича энг намунали вазирлик номинациясида ғолиб деб топилди.

Вазирлик қисқа вақт ичида замонавий, очиқ ва рақамли адлия институтига айланди. Бугунги кунда вазирлик 30 та платформа орқали 380 та тўлиқ рақамлаштирилган хизматларни кўрсатмоқда. 780 дан ортиқ хизматдан онлайн фойдаланиш мумкин. 208 та давлат хизматлари марказидан иборат тармоқ бутун мамлакат бўйлаб ягона стандартни таъминламоқда. Тоғ-кон саноати ва геология вазирлиги ресурсларни бошқариш бўйича энг намунали вазирлик сифатида эътироф этилди.

Мазкур идора масъулиятли, шаффоф ва тежамкор хўжалик юритишнинг ёрқин намунасига айланди. Ажратилган ҳар бир сўм янги конларни қидириб топиш ва соҳани ривожлантиришга сарфланди. Геология-қидирув ишларида сув сарфи 20 фоизга қисқартирилди. Бюджет режалари 2028-йилга қадар олдиндан тузиб чиқилган. Асосий кончилик ускуналарини маҳаллийлаштириш даражаси 84 фоизга етказилди.

Давлат хизматларини кўрсатишдаги ижобий натижалари учун Ички ишлар вазирлиги энг намунали деб тан олинди. Бугунги кунда вазирлик 60 га яқин хизмат турини кўрсатаётган бўлса, уларнинг 95 фоизи тўлиқ рақамли шаклда тақдим этилаётгани диққатга сазовор. Илгари тарқоқ бўлган 72 та маълумотлар базаси ягона «Хавфсиз шаҳар» тизимига бирлаштирилиб, унга 14 та бошқарув маркази ва 20 дан зиёд вазирлик уланган. Ўтган йили 148 мингдан ортиқ маъмурий иш масофавий тарзда кўриб чиқилди ва одамларнинг идорама-идора сарсон бўлишига йўл қўйилмади. Вазирлик замонавий давлат хизматларини инсон учун яратилган қулайлик билан ўлчанишини амалда кўрсатмоқда.
 
Шунингдек, танлов доирасида:

• Тоғ-кон ва геология вазирлиги бошқарма бошлиғи Мақсуд Болибеков энг намунали раҳбар ходим;

• Олий таълим, фан ва инновациялар вазирлиги бўлим бошлиғи Фазлиддин Мўминов энг намунали маъмурий ходим;

• «Ўзатом» агентлиги бош мутахассиси Шохмирзо Умаров энг намунали мутахассис ходим;

• Камбағалликни қисқартириш ва бандлик вазири маслаҳатчиси Умматой Йўлдошева энг намунали аёл ходим;

• Олий таълим, фан ва инновациялар вазирлиги лойиҳа офиси раҳбари Акбархон Собирхонов энг намунали истеъдодли ёш ходим;

• Адлия вазирлиги бўлим бошлиғи Мирсаид Рахматов инсон ресурслари бўйича энг намунали ходим сифатида ғолиб бўлди.

Президент барча ғолибларнинг лавозимларини бир поғона кўтариб, раҳбар кадрлар захирасига киритишни таклиф қилди. Уларнинг теран фикрлаши, ўз устида доимий ишлаши, меҳнат фаолиятига инновацион ёндашувларни жорий қилиши бошқалар учун ўрнак экани таъкидланди.

«Бугунги тадбирда яхши натижа кўрсатганларни эътироф этяпмиз. Бироқ келгуси сафардан бошлаб рўйхатнинг охирида қолган давлат идоралари номини ҳам очиқ айтамиз.
Фаолиятида жиддий камчиликлар кўзга ташланаётган, самарадорлик ва хизмат сифати бўйича оқсаётган ташкилотлар бундан ўзига жиддий хулоса чиқариши керак», – деди президент.

Энди дастур ҳар икки йилда ўтказилади
 
Энди «Сифатли давлат бошқаруви» дастури ҳар икки йилда ўтказилиб, келгуси босқичдан унда маҳаллий ҳокимликлар ҳам иштирок этади.

«Чунки ислоҳотлар натижаси, аввало, энг қуйи бўғинда сезилиши керак. Содда қилиб айтганда, агар туман ёки шаҳар даражасида ўзгариш бўлмаса, ҳар қанча уринмайлик, ислоҳотларимиз кутилган натижани бермайди.
Бугун биз мамлакатимизда давлат бошқарувини такомиллаштириш борасида янги, замонавий босқични бошлаяпмиз.

Бу борада халқимиз ишонадиган, инсон қадрини ҳар томонлама улуғлайдиган, одамларнинг оғирини енгил қиладиган энг самарали давлат тизимини яратишга бундан кейин ҳам асосий урғу берамиз.
Ушбу йўлда барчамиз биргаликда қатъий ҳаракат қилсак, бор куч-ғайратимизни сафарбар этсак, кўзлаган баланд марраларга албатта эришамиз», – деди президент сўзининг якунида.