Давлат идораларида Янги йил корпоративларини бюджет ҳисобидан ташкиллаштириш тақиқланади
Ҳукумат қарори билан давлат идораларига бюджет ҳисобидан Янги йил корпоративларини ўтказиш тақиқланди.
Ўзбекистон ҳукуматининг тегишли қарори давлат харажатларини мақсадли ва тежамкор йўналтириш, ортиқча сарф-харажатларни чеклашга қаратилган.
Ҳужжатга кўра, вазирликлар, идоралар, ҳудудий ҳокимият органлари, жумладан вилоятлар ва Тошкент шаҳар ҳокимликлари, шунингдек давлат улуши 50 фоиздан кам бўлмаган хўжалик бирлашмалари учун Янги йил муносабати билан корпоратив тадбирлар ўтказиш ва байрам дастурхонини ёзиш ман этилади. Бу чеклов бюджет маблағлари билан бир қаторда, бюджетдан ташқари манбалар ҳисобидан молиялаштиришга ҳам тааллуқли.
Қарорда таъкидланишича, мазкур тақиқ давлат органлари ва ташкилотлари томонидан маблағларни асоссиз сарфлашнинг олдини олишга қаратилган. Шу билан бирга, давлат ташкилотлари ходимларига муайян имконият қолдирилган. Ходимлар ўз шахсий маблағлари, яъни ойлик маоши ёки рағбат пуллари ҳисобидан, иш вақтидан ташқари пайтларда Янги йил байрамига бағишланган тадбирларни мустақил равишда ташкил этишлари мумкин.
Ҳукумат қарорининг амал қилиш доираси фақат давлат секторини қамраб олади. Давлатга қарашли бўлмаган тижорат ташкилотлари, хусусий фирмалар ва компаниялар учун мазкур чекловлар татбиқ этилмайди. Улар байрам тадбирларини ўз ички қоидалари ва молиявий имкониятларидан келиб чиқиб ташкил этишда эркин қолади.
Мазкур қарор бюджет интизомини кучайтириш, давлат маблағларидан фойдаланиш самарадорлигини ошириш ва жамоатчилик олдида очиқликни таъминлашга қаратилган навбатдаги чора сифатида баҳоланмоқда.
