Днипро соҳилида қуршовда қолган рус aскарлари очликдан ҳалок бўлаётгани айтилмоқда

Украинадаги Днипро дарёси оролларида бошқа қўшинлардан бутунлай узилиб қолган юзлаб рус аскарлари очлик ва чанқоқликдан ҳалок бўлгани маълум қилинди. Украина разведкаси ҳисоботида қайд этилишича, 2025 йил январидан бери камида 5100 рус ҳарбийси ҳалок бўлган — уларнинг айримлари Украина зарбалари оқибатида, қолганлари эса овқат ва ичимлик суви етишмаслиги сабабли.

Херсон шаҳри Украина томонидан 2022 йил ноябрида озод қилинганидан кейин Днипро дарёси янги фронт чизиғига айланган. Дарёнинг ўнг соҳили Украина, паст ва тошқин хавфи юқори бўлган сўл соҳили эса Россия назоратида қолган. Оралиқдаги ботқоқ ороллар эса рус аскарлари учун ҳалокатли тузоққа айланган.

Украина денгиз пиёдалари полковниги Олександр Завтонов бу ҳудудни «рус аскарлари учун ўлим зонаси» деб атади. Унинг сўзларига кўра, «уларнинг яширинадиган жойи ҳам йўқ». Видеоёзувларда аскарлар ботқоқликда қамиш ва сувўтлар билан камуфляжланиб, кичик қайиқларда қочишга урингани акс этган. Бироқ Украина дронлари уларни тезда аниқлаб, ҳужумга учратган.

Украина хавфсизлик ва ҳамкорлик маркази вакили Оксана Кузаннинг таъкидлашича, Днипро делтасидаги рус бўлинмалари озиқ-овқат, ўқ-дори ва ёрдам етишмаслиги билан курашмоқда. Унинг айтишича, кичик гуруҳлар билан амалга оширилаётган яширинча сузиб ўтиш ҳаракатлари — уруш бошида кузатилмаган янги тактик усул ҳисобланади.

Делта ороллари Украина учун разведка ва алоқа нуқталари сифатида аҳамият касб этса-да, паст ва очиқ ҳудуд бўлгани сабабли аскарлар осонликча нишонга айланмоқда. Натижада, Днипро соҳиллари Россия учун ҳалокатли тузоққа, Украина учун эса муҳим стратегик кузатув нуқтасига айланган.