Доллар мустаҳкамлангани сабабли олтин нархи пасайди

Бугун, 19 феврал куни ликвидлик паст бўлган бозорда олтин нархлари бироз тушди. Бу ҳолат аввалги сессиядаги 2 фоиздан ортиқ ўсишдан сўнг кузатилди. Асосий босим эса АҚШнинг муҳим инфляция маълумотлари эълон қилиниши арафасида доллар мустаҳкамлашгани билан боғлиқ бўлди. Ушбу маълумотлар Федерал захира тизимининг фоиз ставкаларини пасайтириш йўналишига таъсир кўрсатиши мумкин, деб хабар берди «Reuters» ахборот агентлиги.

Қайд этилишча, спот олтин нархи унцияси учун 4 968,10 долларга тушиб, 0,2 фоизга пасайган. АҚШнинг апрел ойида етказиб бериладиган олтин фючерслари эса 0,4 фоизга тушиб, 4 987,60 доллар бўлган.

«Олтин ҳозирча консолидация кайфиятида. Бу кўпроқ Осиёдаги байрам даврида ликвидлик пастлиги билан боғлиқ бўлиб, фундаментал омилларда ўзгариш борлигини англатмайди», – дейди OCBC банки стратеги Кристофер Вонг.

Хитой, Ҳонгконг, Сингапур, Тайван ва Жанубий Корея бозорлари Ой Янги йили муносабати билан ёпиқ бўлди.

АҚШ доллари бир ҳафтадан ортиқ вақт ичидаги энг юқори даражасига яқин барқарор сақланди. Бу эса долларда баҳоланадиган қимматбаҳо металларни бошқа валюта эгалари учун қимматлаштирди.

Фоиз ставкаси ўзгаришсиз қолдирилиши

Шу билан бирга, январ ойига оид Фед йиғилиши баённомалари сиёсатчиларнинг қарийб бир овоздан фоиз ставкаларини ўзгаришсиз қолдиришга келишиб олганини кўрсатди. Бироқ кейинги қадамлар борасида фикрлар турлича бўлди: «бир нечта» аъзо инфляция юқори даражада сақланса, ставкаларни оширишга тайёрлигини билдирган, бошқалар эса инфляция пасайса, қўшимча пасайтиришларни қўллаб-қувватлашга мойил.

CME’нинг «FedWatch» воситасига кўра, бозорлар жорий йилдаги илк фоиз ставкаси пасайтирилиши июн ойида бўлишини кутмоқда.

Асосий эътибор ҳисоботларга қаратилган

Инвесторлар бугун эълон қилинадиган ишсизлик бўйича ҳафталик аризалар ва эртага, 20 феврал куни чиқадиган Шахсий истеъмол харажатлари (PCE) ҳисоботига эътибор қаратмоқда. PCE Фед афзал кўрадиган инфляция кўрсаткичи ҳисобланади. Фоиз даромади келтирмайдиган олтин одатда паст фоиз ставкалари муҳитида яхши натижа кўрсатади.

«Яқин муддатда олтин ва кумуш нархлари босқичма-босқич юқорига йўналиш олишидан олдин маълум бир консолидация даврини кўрамиз. Кумуш учун консолидация 70–90 доллар оралиғида сақланиши, олтин эса вақтинча 4 800–5 100 доллар диапазонида савдо қилиниши мумкин», – дейди Вонг.

Кеча, 18 феврал куни 5 фоиздан ортиқ ўсганидан сўнг, спот кумуш унцияси 77,18 доллар даражасида барқарор қолди. Спот платина 0,1 фоизга тушиб, 2 069,58 долларга етди, палладий эса 1 715,93 доллар даражасида ўзгаришсиз сақланди.