Дунёда энг кўп пўлат ишлаб чиқараётган мамлакатлар маълум қилинди

World Steel Association маълумотларига кўра, 2025 йилда жаҳон бўйича хом пўлат ишлаб чиқариш ҳажми 1,849 миллиард тоннани ташкил этган. Қурилиш, инфратузилма, автомобилсозлик ва ишлаб чиқариш соҳаларида пўлатга бўлган талаб юқори бўлиб, энг кўп пўлат ишлаб чиқараётган давлатлар жаҳон иқтисодиётида катта ўрин эгалламоқда.

Мамлакатлар улуши

Рейтингда Хитой 960,8 миллион тонна пўлат ишлаб чиқариб, дунё бозорида мутлақ устунликни сақлаб қолди. Мамлакат улуши жаҳон умумий ҳажмининг 52 фоизига тенг бўлган. Бу эса кейинги ўн икки йирик ишлаб чиқарувчи давлатнинг жами кўрсаткичидан ҳам юқори ҳисобланади.

Таҳлилчиларга кўра, Хитойнинг етакчилиги йирик қурилиш лойиҳалари, кучли саноат экспорти ҳамда металлургия соҳасини давлат томонидан қўллаб-қувватлаш сиёсати билан боғлиқ. Мамлакат ички бозорда ҳам пўлатга бўлган юқори талабни сақлаб келмоқда.

Иккинчи ўринни 164,9 миллион тонна билан Ҳиндистон эгаллади. Сўнгги йилларда мамлакатда урбанизация жараёни тезлашиб, инфратузилма лойиҳалари сони ортмоқда. Бу эса металлургия саноати ривожини рағбатлантирмоқда.

АҚШ ва Япония мос равишда 82 миллион ва 80,7 миллион тонна пўлат ишлаб чиқарган. Жанубий Корея, Россия, Германия ва Италия ҳам йирик пўлат ишлаб чиқарувчи давлатлар қаторида қолмоқда.

Шу билан бирга, ривожланган мамлакатлар энди ишлаб чиқариш ҳажмини кўпайтиришдан кўра, соҳани модернизация қилиш ва экологик технологияларга ўтишга кўпроқ эътибор қаратмоқда. Хусусан, электродугали печлар ва водород асосида пўлат ишлаб чиқариш технологияларига инвестициялар ортиб бормоқда.