«Фақат ахмоқлар бошқача ўйлайди»: Трамп нефт нархининг кўтарилишига муносабат билдирди
Аввалроқ Лондоннинг ICE биржасида 2026-йил май ойида етказиб бериладиган «Брент» маркали нефт нархи 2022-йил 30-августдан буён биринчи марта бир баррел учун 102 доллардан ошганлиги ҳақида хабар берилганди.
АҚШ президенти Доналд Трамп жаҳон бозорида нефт нархининг кескин ошишига муносабат билдирди. Унинг таъкидлашича, бу ҳолат вақтинчалик бўлиб, Эроннинг ядро дастури билан боғлиқ хавф бартараф этилгандан кейин нархлар яна пасайиши мумкин.
«Нефт нархларининг қисқа муддатли ошиши — Эроннинг ядровий таҳдиди бартараф этилгач тезда пасайиб кетадиган ҳолат. Бу АҚШ ва бутун дунё хавфсизлиги ҳамда тинчлиги учун тўланадиган жуда кичик нархдир. Бошқача ўйлайдиганлар фақат аҳмоқлардир!» — деб ёзди у ўзининг Truth Social ижтимоий тармоғида.
Нефт нархининг ошиши
2026-йил 28-февралда АҚШ ва Исроил томонидан Эронга қарши ҳарбий ҳаракатлар бошлангани нефт бозорида кескин беқарорликни келтириб чиқарди.
Уруш бошланган пайтда нефт нархи тахминан 70 доллар атрофида эди. Бироқ жанглар кенгайиб, энергетика инфратузилмаларига зарбалар берила бошлагач, нархлар тез суръатда ошди.
7-март куни Исроил илк бор Эрон нефт инфратузилмасига авиазарба берди. Теҳрон ва унинг атрофидаги бешта энергетика объекти ҳужумга учради.
Бунга жавобан Ислом инқилоби қўриқчилари корпуси Форс кўрфази мамлакатларидаги нефт объектларига ҳужум қилиш билан таҳдид қилди. Айрим таҳлилчилар нефт нархи янада ошиши мумкинлигини истисно қилмаяпти. The Guardian нашри келтирган маълумотга кўра, Эрон томони нефт нархи ҳатто 200 долларгача чиқиши мумкинлигидан огоҳлантирган.
Шу билан бирга, АҚШ нефт бозоридаги босимни камайтириш учун айрим чораларни кўриб чиқмоқда. Жумладан, Россия нефтига нисбатан айрим санкцияларни юмшатиш ва айрим давлатларга уни сотиб олиш учун вақтинча рухсат бериш масаласи муҳокама қилинмоқда.
