Германияда банк сейфлари ўмариб кетилди

Германиянинг ғарбида жойлашган Гельзенкирхен шаҳрида Sparkasse банки филиалида йирик банк талончилиги содир этилди. Handelsblatt нашрининг ёзишича, дастлабки маълумотларга кўра, номаълум шахслар банк хазина қисмига кириб, тахминан 3200 та сейфни бузиб очган.

Тергов маълумотларига кўра, жиноятчилар бинога ерости автотураргоҳ орқали кирган. Улар бир нечта хизмат хоналарини бузиб ўтиб, архив хонаси билан хазина ўртасидаги деворда катта тешик очган. Мутахассислар тешик махсус бурғилаш ускуналари ёрдамида очилганини, жиноятчилар профессионал тайёргарликка эга бўлганини таъкидламоқда.

Видеокузатув камералари эрталаб автотураргоҳдан чиқиб кетган қора рангли йирик автомобилни қайд этган. Машинада ниқоб таққан бир нечта шахс бўлгани маълум қилинди. Кейинчалик ушбу автомобил Ҳанновер шаҳрида ўғирлаб кетилгани аниқланган.

Ҳодиса оқибатида 2500 нафардан ортиқ банк мижози жабр кўрган. Ҳар бир сейф камида 10,3 минг евро миқдорида суғурталанган бўлгани сабабли, дастлабки суғурта зарари 34 млн евро атрофида баҳоланмоқда.

Талончилик ҳақида хабар тарқалганидан сўнг, банк филиали олдига бир неча юз нафар мижоз йиғилган. Улар зарар қандай тартибда қопланиши масаласига ойдинлик киритишни талаб қилган. Полиция бинога киришни вақтинча чеклаб, филиални ёпган.

Айни пайтда ҳеч ким қўлга олинмаган, гумонланувчилар қидирувда. Тергов ҳаракатлари давом этмоқда.

2025 йил февраль ойида ҳам Германиянинг Любек шаҳридаги Deutsche Bank филиалида тунда 326 та сейф бузиб очилиб, 10 млн евро ўғирлаб кетилган эди.