Гитлер туғилган уйда полиция участкаси очилди
Дастлаб бу бинони бузиб ташлаш режалаштирилган.
Австриянинг Браунау-на-Инн шаҳрида Адолф Гитлер туғилган уйда полиция участкаси иш бошлади. Бу ҳақда «Reuters» агентлиги хабар бермоқда.
Маълум қилинишича, участканинг расмий очилиш маросими 22 июл куни бўлиб ўтган ва унда Австрия ички ишлар вазири Герхард Карнер ҳамда бошқа расмийлар иштирок этган.
Австрия ҳукумати уйнинг собиқ эгаси билан узоқ йиллар давом этган судлашувлардан сўнг, 2016 йилда бинони давлат ҳисобига мусодара қилган эди.
Дастлаб бу жой неонацистларнинг зиёратгоҳига айланиб қолмаслиги учун бинони бузиб ташлаш режалаштирилган. Бироқ якунда бу фикрдан қайтилиб, унинг ўрнида полиция участкасини жойлаштиришга қарор қилинган. 2020 йилда бинони реконструкция қилиш танлови якунланганда, бу лойиҳа учун беш миллион евро сарфланиши эълон қилинган эди.
Агентликнинг қайд этишича, ҳозирда бу бинода Гитлер туғилганини эслатиб турувчи ягона нарса — уй ёнида ўрнатилган хотира тошидир. Маутхаузен концлагеридан келтирилган ушбу тошга «Фашизм — бошқа ҳеч қачон» деб ёзиб қўйилган.
Маълумот ўрнида, Адолф Гитлер 1889 йилда Залцбург яқинидаги Браунау-на-Инн шаҳридаги ушбу уйда туғилган. Турли йилларда мазкур бинодан мактаб, кутубхона, шунингдек, ногиронлиги бўлган шахслар учун бошпана сифатида фойдаланилган.
