Ипотекага олинган уйга бошқа кишиларни рўйхатга қўйишда банк рухсати бекор қилинади
Энди тақиқ қўйилган тураржойга гаровга олувчининг розилигини олмасдан ҳам бошқа шахсларни доимий ёки вақтинча рўйхатга қўйиш мумкин. Рўйхатдан ўтаётган шахс исталган пайтда пропискадан чиқарилишига олдиндан ёзма розилик бериши шарт.
© vaqt.uzЎзбекистонда ипотекага сотиб олинган уйга бошқа шахсларни банкнинг розилигисиз рўйхатга қўйишга рухсат берилади. Бу бўйича қарорни 15-июль куни президент Шавкат Мирзиёев имзолади.
Унга кўра, тақиқ ёки хатлов қуйилган тураржойга гаровга олувчининг розилигисиз яшаш ва турган жойи бўйича рўйхатдан ўтказишга рухсат берилади. Бунда рўйхатдан ўтказилаётган шахс мулкдорнинг (гаровга олувчининг, тақиқни куйишга ёки ечиша масъул органнинг) ички ишлар органларига қилган мурожаати асосида унинг рўйхатдан ўтказилгани бекор қилинишига аввалдан розилик бериши зарур.
Бундан ташқари, 2027-йил 1-январдан бошлаб кучмас мулкка бўлган хуқуқларни давлат рўйхатидан ўтказиш пайтида хуқуқ эгаси ўз вақтида рўйхатдан ўтказувчи органга мурожаат этмагани аникланганда маъмурий жавобгарлик чораси кўлламасдан кечиктириш муддатидан келиб чиқиб рўйхатдан ўтказиш учун оширилган ставкаларда тўлов ундириш тизими жорий этилади.
Шунингдек, ушбу санадан эътиборан солиқ тўловчига хусусий мулк хуқуқи асосида тегишли бўлган тураржой мерос тартибида ёки яқин қариндошидан ҳадя сифатида олинган бўлса, ушбу турар жойни сотишдан олинган даромадга солиқ солинмаслиги учун белгиланган муддатни васият қилувчи ёки ҳадя қилувчининг мазкур тураржойга бўлган мулк хуқуқи ёки давлат рўйхатидан ўтказилган санадан бошлаб ҳисобланади.
Эслатиб ўтамиз, давлат раҳбарининг ушбу қарорига асосан Ўзбекистонда фуқаролик паспорти ёки ID-картани йўқотиб қўйганлик учун маъмурий жавобгарлик бекор қилиниб, фақат қўшимча давлат божи ундириш тизими жорий этилади.
