Италия Apple’га махфийлик қоидаларини бузгани учун 115 млн доллар жарима солди

Италиянинг рақобатни ҳимоя қилиш органи(AGCM) АҚШ технологик гиганти Apple’ни App Store’даги амалиётлари учун 115 миллион доллар миқдорида жаримага тортди. Бу ҳақда Reuters хабар берди.

Маълум қилинишича, Apple мобил иловалар бозорида устун мавқеини суиистеъмол қилган. Хусусан, App Store орқали учинчи томон илова ишлаб чиқувчилари билан муносабатларда компания «де-факто мутлақ устунлик»ка эга бўлган ва Европа қоидаларига зид ҳаракат қилган.

AGCM 2023 йил май ойида текширув бошлаган бўлиб, унда Apple 2021 йил апрелидан бошлаб учинчи томон ишлаб чиқувчиларни янги, янада чекловчи махфийлик сиёсати орқали камситгани таъкидланган. Регуляторга кўра, компания App Tracking Transparency (ATT) механизми орқали ишлаб чиқувчилардан реклама мақсадларида маълумот тўплаш учун алоҳида розилик олишни мажбурий қилиб қўйган.

Италия идораси баёнотида айтилишича, ATT сиёсати шартлари бир томонлама жорий этилган ва Apple’нинг бизнес ҳамкорлари манфаатларига зарар етказган. Шунингдек, регулятор бу механизм компания таъкидлаганидек, махфийликни таъминлаш мақсадига мутаносиб эмаслигини қайд этган. Ишлаб чиқувчилар эса бир хил мақсад учун қўшимча равишда яна розилик сўрашга мажбур бўлган.

Apple эса қарорга қатъий норозилигини билдирди. Компания ATT тизими фойдаланувчиларга уларнинг фаолияти турли иловалар ва веб-сайтлар орқали кузатилиши ёки йўқлигини назорат қилиш имконини бериш учун яратилганини таъкидлади. Шунингдек, мазкур қоидалар барча ишлаб чиқувчиларга, жумладан Apple’нинг ўзига ҳам бир хил татбиқ этилишини билдирди.

Компания регулятор қароридан шикоят қилишини маълум қилиб, шахсий маълумотларни кучли ҳимоя қилиш борасидаги позициясини сақлаб қолишини таъкидлади.