Камбоджа Таиланд билан чегара ўтиш пунктларини ёпди
Чегарадаги тўқнашувлар авж олгани сабаб икки давлат ўртасидаги барча ўтиш ҳаракатлари тўхтатилди.
Камбоджа ҳукумати Таиланд билан бўлган давлат чегарасидаги барча ўтиш пунктларини номаълум муддатга ёпиш тўғрисида қарор қабул қилди. Қарор чегара ҳудудларида қуролли тўқнашувлар давом этаётгани ва хавфсизлик билан боғлиқ вазият кескинлашгани билан изоҳланмоқда.
Камбоджа Ички ишлар вазирлиги баёнотида қайд этилишича, мамлакат Таиланд чегарасида кириш ва чиқиш ҳаракатлари дарҳол ва кейинги расмий огоҳлантиришга қадар тўлиқ тўхтатилган. Расмийлар бу чора фуқаролар хавфсизлигини таъминлаш мақсадида кўрилганини таъкидламоқда.
АҚШ президенти Доналд Трамп 12 декабр куни томонлар ўт очишни тўхтатиш бўйича келишувга яқин эканини маълум қилган эди. Бироқ шунга қарамай, кейинги кунларда ҳам чегара ҳудудларида қуролли тўқнашувлар тўхтамади ва вазият кескинлигича қолмоқда.
Таиланд бош вазири Анутин Чарнвиракулнинг билдиришича, ўт очишни тўлиқ тўхтатиш фақат Камбоджа қўшинлари чегара ҳудудидан олиб чиқилгандан ва миналар тозалангандан кейингина мумкин. Унинг сўзларига кўра, аҳоли ва мамлакат хавфсизлигига таҳдид сақланиб турган бир пайтда ҳарбий ҳаракатлар давом этиши мумкин.
Анутин, шунингдек, ҳужумларни биринчи бўлиб тўхтатиш масъулияти Камбоджа томони зиммасида эканини таъкидлаган. Бу йил қайта кучайган ҳудудий низо фонидаги тўқнашувлар оқибатида 500 мингдан ортиқ аҳоли хавфсиз ҳудудларга эвакуация қилинган.
Маълумотларга кўра, сўнгги ҳафталардаги жанглар давомида 20 нафардан зиёд инсон ҳалок бўлган, юзлаб одамлар турли даражада жароҳат олган. 13 декабр куни Таиланд расмийлари навбатдаги тўқнашувларда яна тўрт нафар ҳарбий ҳалок бўлганини тасдиқлади. 8 декабрдан буён Таиланд ҳарбийлари орасидаги қурбонлар сони 14 нафарга етган.
Қарийб 800 километрга чўзилган умумий чегарадаги вазиятни юмшатиш мақсадида Доналд Трамп воситачилик қилмоқда. У томонларни ҳарбий ҳаракатларни давом эттирган тақдирда савдо келишувларини бекор қилиш ва қўшимча божлар жорий этиш билан огоҳлантирган.
Эслатиб ўтамиз, хужумлар 8 декабр куни икки давлат чегарасидаги таиландлик ҳарбий ҳалок бўлган ҳужумдан сўнг Таиланд Камбоджа ҳудудидаги бир неча ҳарбий объектларга ҳаводан зарба бериш оқибатида бошланган.
