Марк Рютте: «НАТО Эронга қарши урушда Трампни қўллаб-қувватлаши лозим»
НАТО Бош котиби Марк Рютте альянс давлатларини Эронга қарши ҳарбий амалиётда АҚШ Президенти Доналд Трамп атрофида жипслашишга ва ядровий таҳдиднинг олдини олишда «ягона фронт» бўлиб чиқишга чақирди.
«Politico» нашрининг хабар беришича, Марк Рютте CBS телеканалига берган интервюсида айрим Европа давлатларининг иккиланишига қарамай, якунда улар Трампнинг ҳаракатларини қўллаб-қувватлашига ишонч билдирган. Бош котибнинг таъкидлашича, ядровий қуролга эга Эрон нафақат Исроил, балки Европа ва бутун дунё барқарорлиги учун тўғридан тўғри хавф туғдиради. «Мен бир нарсани биламан, биз доим бирлашамиз», деди алянс раҳбари.
Рюттенинг тушунтиришича, европалик шерикларнинг жараёнга кечикиб қўшилиши ҳужумларнинг кутилмаганлик эффектини сақлаб қолиш мақсадида уларнинг дастлабки режалаштиришга жалб этилмагани билан боғлиқ. У Шимолий Корея билан боғлиқ тажрибани мисол келтириб, музокаралар ҳаддан ташқари чўзилиб кетса, ядровий қурол пайдо бўлиши ва вазиятни назорат қилиш имконияти бой берилишини айтди. Шу сабабли, Рютте Трампнинг ҳарбий саъй-ҳаракатларини «дунёни хавфсиз қилиш» йўлидаги қадам сифатида тўлиқ ёқлади.
Трампнинг «қўрқоқлар» ҳақидаги айблови
Доналд Трамп ўзининг «Truth Social» тармоғидаги саҳифасида НАТО давлатларини кескин танқид остига олди. Унинг фикрича, АҚШсиз ушбу алянс «қоғоз йўлбарс»дан бошқа нарса эмас. Трамп Европа давлатларини Эроннинг ядровий дастурини тўхтатишда иштирок этмаганини, энди эса Ҳўрмуз бўғозини очишда ёрдам беришдан қочаётганларини қоралади.
«Уруш ҳарбий жиҳатдан ғалаба билан якунланди, улар учун хавф деярли қолмади. Энди эса юқори нефт нархларидан шикоят қилишмоқда, лекин Ҳўрмуз бўғозини очишдек оддий ҳарбий маневрда ёрдам беришни исташмаяпти. Қўрқоқлар! Биз буни унутмаймиз», деб ёзди Трамп.
АҚШ президентининг фикрича, нефт нархининг ошишига фақатгина бўғознинг ёпиқлиги сабаб бўлмоқда ва иттифоқчиларнинг ёрдамисиз ҳам АҚШ бу муаммони ҳал қилишга қодир.
Европанинг иккиланиши
Европанинг етакчи давлатлари НАТО мудофаа алянси эканини рўкач қилиб, Эрон билан урушга киришдан бош тортмоқда. Айниқса, Ҳўрмуз бўғозини очиш бўйича ҳарбий миссияда қатнашиш Брюссел ва Париж учун сиёсий жиҳатдан мураккаб масала бўлиб қолмоқда.
Бироқ Марк Рютте Трампнинг ғазабини тушунишини ва европалик ҳамкорлардан ҳам вазиятни тўғри баҳолашни сўрашини билдирди. Унга кўра, Трамп ва НАТО ўртасидаги ушбу кескинлик алянснинг келажакдаги бирлиги ва АҚШнинг Европа хавфсизлигидаги ролини қайта кўриб чиқишига олиб келиши мумкин.
