«Мен бўлмаганимда қамоқда бўлардинг» Трамп Нетаняхуга пўписа қилди

Axios нашрининг ўз манбаларига таяниб ёзишича, АҚШ президенти Доналд Трамп Исроил бош вазири Бинямин Нетаняҳуга ғазаб билан қўнғироқ қилиб, ундан Ливандаги ҳужумларни тўхтатишни талаб қилган.

Нашр маълумотларига кўра, Трамп суҳбат давомида Нетаняхунинг сўнгги ҳаракатларини танқид қилиб, уни «ақлдан озган» деб атаган.

«Сенинг томинг кетган. Агар мен бўлмаганимда қамоқда ўтирган бўлар эдинг. Кетингни тозалаб юрибман. Ҳозир ҳамма сени ёмон кўради. Шу сабабли ҳамма Исроилни ёмон кўради», деган АҚШ президенти.

Ливандаги ҳарбий амалиётлар

Трампнинг норозилиги асосан Исроилнинг Ливандаги ҳарбий ҳаракатлари билан боғлиқ бўлган. Унинг фикрича, бу амалиётлар натижасида тинч аҳоли орасида қурбонлар сони ортиб бормоқда.

Манбаларнинг таъкидлашича, АҚШ президенти айрим ҳолатларда «Ҳизбуллоҳ» қўмондонларини йўқ қилиш мақсадида бутун бинолар вайрон қилинаётганидан хавотир билдирган. Трамп бундай ёндашув катта гуманитар оқибатларга олиб келиши мумкинлигини таъкидлаган.

Суҳбат давомида Трамп Исроилнинг Ливандаги ҳаракатлари мамлакатнинг халқаро майдондаги мавқеига салбий таъсир кўрсатаётганини ҳам қайд этган. У бу сиёсат давом этса, Исроилнинг халқаро яккаланиши янада кучайиши мумкинлигини айтган.