Олтин сотиб олиш бўйича етакчи давлатлар эълон қилинди
Жаҳон олтин кенгаши маълумотларига кўра, 2025-йилнинг дастлабки уч чорагида заргарлик ва инвестиция соҳаларида олтинга бўлган глобал талаб 2042 тоннани ташкил этди.
Жорий йилнинг биринчи уч чорагида зaргарлик ва инвестиция маҳсулотлари бўйича олтинга бўлган глобал талаб 2042 тонна даражасига етди. Бу ҳақда Жаҳон олтин кенгаши (World Gold Council) ҳисоботида маълум қилинди.
Қайд этилишича, унинг 1047 тоннаси зaргарлик буюмлари, 947 тоннаси эса олтиннинг инвестиция кўринишларига — яъни, қуймалар ва тангаларга тўғри келган.
Econovis нашри ёзишича, жаҳон бўйича олтин сотиб олишда етакчи ўнта давлат орасида Хитой 591 тонна билан биринчи ўринни эгаллади. Ундан кейин Ҳиндистон — 462 тонна, АҚШ — 109 тонна, Туркия — 76 тонна, Эрон — 58 тонна, Россия — 51 тонна, Саудия Арабистони — 48 тонна, Таиланд — 38 тонна, Ветнам — 37 тонна ва Германия — 36 тонна кўрсаткич билан рўйхатни якунлайди.
Мутахассислар таъкидлашича, Хитой ва Ҳиндистоннинг улуши жаҳон олтин бозоридаги талабнинг ярмидан кўпроғини ташкил этади ва дунёдаги қимматбаҳо металлар бозорининг асосий ҳаракатлантирувчи кучлари ҳисобланади.
