Полша Путинни ҳибсга олиш билан таҳдид қилди

Полша Ташқи ишлар вазирлиги раҳбари Радослав Сикорский, агар Россия президенти Владимир Путиннинг самолёти Полша ҳаво ҳудудидан учиб ўтса, уни ҳибсга олишларини билдирди.

Унинг таъкидлашича, Полша Россия етакчисининг АҚШ президенти Доналд Трамп билан Будапештдаги учрашув учун парвози давомида унинг дахлсизлигини кафолатлай олмайди.

«Полшанинг мустақил суди ҳукуматга самолётни мажбурий қўндириш ва гумонланувчини Гаагага жўнатишни буюрмаслигига кафолат бера олмайман», - деди Сикорский Родзина радиоси эфирида.

У Халқаро жиноий суд юрисдикциясини тан олган барча давлатлар Путинни ўз ҳудудида пайдо бўлганида ҳибсга олишлари ва уни Гаагага жўнатишлари шарт эканини эслатиб ўтди.

«Менимча, Россия томони буни жуда яхши тушунади. Шу сабабли, агар учрашув бўлиб ўтса, самолёт бошқа йўналишни танлаши эҳтимолдан холи эмас», - дея қўшимча қилди вазир.

ХЖС 2023 йилда Россия президентини украиналик болаларни ноқонуний депортация қилишда айблаб, ҳибсга олиш ордерини чиқарганди. Россия суднинг юрисдикциясини тан олмайди ва айбловларни рад этади.

Бироқ, Путин Венгрияга Полша ҳудуди орқали учиши эҳтимолдан йироқ, гарчи бу Россиядан Будапештгача бўлган энг қисқа тўғри йўналиш бўлса ҳам. Эҳтимол, Россия раҳбари Қора денгиз, Болгария, Сербия ва Венгрия ҳаво кенгликлари орқали учади.

Аксинча, Болгария эса Путин самолёти учун ҳаво йўлагини тақдим этишга тайёрлигини маълум қилди. Мамлакат ташқи ишлар вазири Георг Георгиевнинг таъкидлашича, «агар иштирокчилардан бири учрашув жойига етиб бора олмаса, тинчлик музокараларини олиб боришнинг иложи йўқ».

Москва ҳозирча Болгария орқали учиб ўтиш учун расмий сўров юбормаган, аммо бу йўналиш Венгрия пойтахтига парвоз вақтини сезиларли даражада қисқартиради. Бошқа йўллар Европа Иттифоқи мамлакатлари ёки Украина устидан ўтади, бу эса уларни сиёсий ва ҳуқуқий жиҳатдан мураккаблаштиради.

Бош вазир Виктор Орбан Москва ва Вашингтон билан илиқ муносабатларни сақлаб келаётган Венгрия Путиннинг хавфсиз ташрифи ва ватанига қайтишини таъминлашга ваъда берди. Бироқ, мамлакатга кириш учун Россия самолёти Европа Иттифоқининг ҳеч бўлмаганда битта давлати устидан учиб ўтиши керак - уларнинг барчаси, жумладан, Болгария ва Полша ХЖС аъзоси бўлиб қолмоқда.