Президент селекторида «катта тозалаш»

Бу ва бошқа муҳим маълумотларни 27-январ куни Президент Шавкат Мирзиёев «Тошкент шаҳрида хавфсиз муҳитни шакллантириш ҳамда жамоат хавфсизлигини самарали таъминлаш бўйича намунавий амалиётни яратиш чора-тадбирлари» юзасидан ўтказилган видеоселектор йиғилишида очиқлади.

Селектор олдингиларга қараганда анча танқидий руҳда ўтди. Бу сафар ишдан олинганлар кўп. Ҳайфсан олган, кескин танқид қилинганлар ҳам йўқ эмас.

Январ ойи бошидан буён қамоққа олингани иддао қилинаётган Ички ишлар вазирининг ўринбосари Бекмурод Абдуллаев ва Жазони ижро этиш департаменти бошлиғи бўлган Рустам Турсунов ҳақиқатан ҳам қамоқда экани очиқланди. Улар давлатга тегишли 186 миллиард сўмни ўзлаштиргани айбланмоқда. 

«Коррупциявий схемалар бўйича 4,2 триллион сўм зарар аниқланиб, 1,3 триллион сўми ундирилди. 55 нафар шахс қамоққа олинди. Масалан, Ички ишлар вазирлиги тизимида давлат харидларида 186 миллиард сўм бюджет маблағи ўзлаштирилгани аниқланиб, вазир ўринбосари Бекмурод Абдуллаев ва департамент бошлиғи Рустам Турсуновга нисбатан жиноят иши қўзғатилди», дейди Шавкат Мирзиёев.

Президент йиғилишни Тошкент шаҳар ИИББ бошлиғи Равшан Султонхўжаев ва Тошкент шаҳар прокурори в.б. Анвар Ўрмоновни танқид қилиш ва ҳайфсан бериб, олти ойлик синов муддати белгилаш билан бошлади.

Давлат раҳбари ИИББ ва шаҳар прокурорини жиноятларни фош қилиш ва олдини олиш ўрнига фақат микроавтобусда шаҳар айланиш билан бандлигини танқид қилди.

Шунингдек, департамент биринчи ўринбосари Кенжаев, хавфсизлик раҳбари Берлибоев, Миллий гвардиядан Ортиқов, Тошкент шаҳар суди раиси Олимжон Исмаилов, адлия биринчи ўринбосари Ҳамдам Назаров, Тошкент шаҳар божхона бошқармаси бошлиғи Толибжон Баҳодирович Саидов, солиқчилардан Насимжонов республикага намуна бўлмаяптиганини кескин танқид қилди ва уларни ҳалигача эски “қолип”дан чиқиб кета олмаётгани айтди.

Президент Тошкент шаҳридаги профилактика хизматларининг иши тўғри ташкил этилмагани учун муаммолар тўпланиб қолганини ҳам қўшимча қилди.

«Ички ишлар бошлиқлари профилактика инспекторларини эрталаб соат еттида ва кечқурун ўнда йиғиб, соатлаб йиғин ўтказади. Улар ҳуқуқбузарлик билан ишлаш ўрнига коммунал қарздорлик ва алимент ундириш, армияга юбориш ва бошқа жамоат ишларига ҳам жалб қилинмоқда. Оқибатда уларни маҳалладан топиб бўлмайди. Бир нечта маҳаллага ўзим одам юбордим. Кўпи иш жойида йўқ ёки бошқа иш билан юрибди», деди Президент.

Бундан ташқари, Тошкент шаҳар ички ишлар тизимидаги терговчи ва суриштирувчилар фаолиятида сифат йўқлиги, ходимларда малака етишмагани учун ўтган йили 833 та ҳолат бўйича жиноят иши қўзғатилмай, яширилгани айтилди.

Тақдим этилган маълумотларга кўра, республикадаги 208 та туман ичида Чилонзор оилавий зўравонлик, талончилик, безорилик бўйича, Юнусобод босқинчилик бўйича биринчи ўринда. Ёки ўтган йили Яшнобод ва Мирободда қотиллик, Олмазорда тан жароҳати, Шайхонтоҳурда талончилик ҳолатлари энг кўп содир этилган.

Шунингдек, Шавкат Мирзиёев йирик бозорлар ва гавжум жойларда жамоат хавфсизлигини таъминлаш бўйича гвардия, ички ишлар ва фавқулодда вазиятлар идораларининг ҳамкорлиги етарли эмаслигини айтиб, бозорларни рақамлаштириш жуда суст кетаётганини, Ички ишлар вазирининг ахборот технологияларига масъул ўринбосари Зуфар Қурбонов тайинланганига икки йилдан ошганига қарамасдан, тизимни рақамлаштириш бўйича ҳали сезиларли натижа кўринмаётганини танқид қилди.

Президент солиқ масаласига ҳам тўхталиб, Тошкент шаҳрида яширин ва кузатилмайдиган иқтисодиёт 60 триллион сўмга етгани ва бу бюджет йилiga 7,5 триллион сўмни йўқотишга олиб келаётганини таъкидлади. Давлат раҳбари яширин иқтисодиётга қарши курашиш ва солиқ маъмурчилиги бўйича пойтахт солиқ органларининг иши мутлақо қониқарсиз эканини айтиб, айрим солиқ бошлиқлари тушумни кўпайтириш ўрнига қўштирноқ ичидаги “тадбиркор”ларга “ҳомийлик” қилиш билан банд эканини ҳам очиқлади.

Президент бу ишлар ортидан ўтган ҳафтада Мирзо Улуғбек тумани солиқ инспекцияси бошлиғи Усманов ишдан олиниб, унга жиноят иши қўзғатилганини, у инспекция биносининг бир қисмини шахсий мақсадда ижарага бериб, 315 миллион сўмни ўзлаштиргани, иш фаолиятида гуруҳбозликка ва маишатбозликка берилгани аниқланганини айтди.

Шунингдек, Президент Шайхонтоҳур тумани солиқ инспекцияси томонидан “Чорсу” бозорида тўлов интизоми йўлга қўйилмагани, “Малика” савдо комплексисида эса аҳвол бундан ҳам аянчли эканини кўрсатиб ўтди.

Тошкент шаҳар солиқ бошқармаси бюджет режасини яхши ишлаётган тадбиркорларга ортиқча солиқ солиш орқали тўлдираётгани, жумладан, 46,4 минг корхонадан 876 миллиард сўм ортиқча тўлов ундирилгани очиқланди.

Давлат раҳбарининг маълум қилишича, Солиқ қўмитасида қўшилган қиймат солиғидан сунъий ортиқча тўлов ҳосил қилиш орқали уни бюджетдан ноқонуний қоплаш ҳолатлари кўпайган. Ўтган йилда мазкур солиқни ноқонуний қайтариш бўйича 20 нафар солиқ ходимига жиноят иши қўзғатилган.

Видеоселектор давомида ушбу йўналишга жавобгар бўлган, етти йилдан бери ишлаб келаётган қўмита раисининг биринчи ўринбосари Мубин Мирзаевнинг лоқайдлиги ва масъулиятсизлиги айтилди ва Мирзаев ишдан олинди.

Шунингдек, Шайхонтоҳур тумани солиқ инспекцияси бошлиғи Муллажонов ва Тошкент шаҳар солиқ бошқармаси бошлиғи Насимджановни ишдан олиш, фаолиятини ўрганиб, қонун устуворлигини таъминлаш топшириғи ҳам берилди. Бундан ташқари, Солиқ қўмитаси раиси Фаррух Пўлатовга Тошкент шаҳридаги барча туман солиқ инспекциялари бошлиқларини ишдан олиб, вазифасини бажарувчи қилиб қўйиш топширилди.

Нафақат ИИБ ва солиқ, балки прокуратура тизимида ҳам ишдан олишлар бўлди. Бош прокуратура ҳузуридаги Департаментнинг шаҳар бошқармаси бошлиғи ўринбосари Ғаниев қўштирноқ остидаги “тадбиркор”ларга солиқдан қочишда йўл кўрсатиб юргани учун бугуннинг ўзида ишдан олинди.

Президент ҳозирда “Ўзбекнефтгаз” АЖ ва Давлат активларини бошқариш агентлигида катта тафтиш кетaётгани, миллиардлаб сўмлик талон-торожликлар аниқланганини ҳам маълум қилди.

Мисол учун, Давлат активларини бошқариш агентлигининг мансабдор шахслари бозор қиймати камида 250 миллиард сўмлик ер участкасини ёпиқ аукционга чиқариб, 120 миллиард сўмга сотиб юборган.

Шу боис, кеча агентлик директори Ортиқов ишдан олинди.

Селекторда Тошкент шаҳри мисолида айтилган барча масалалар бутун республика ҳуқуқ-тартибот идораларига бирдек тегишли экани қайд этилди. Бундан ташқари, кўплаб масалалар муҳокама қилинди. Уларнинг барчаси билан VAQT.UZ сайтида танишишингиз мумкин.