Қирғизистон «TikTok»ни қайси шарт билан очишини маълум қилди

Қирғизистонда «TikTok» ижтимоий тармоғига кириш имкони фақат тақиқланган контентни алоҳида блоклаш имконини берувчи махсус ускуналар ишга туширилганидан кейин тикланади. Бу ҳақда парламент йиғилишида Қирғизистон Миллий хавфсизлик давлат қўмитаси раиси ўринбосари Алишер Эрбаев маълум қилди.

Масалани депутат Дастан Бекешев кўтарди. Унинг таъкидлашича, «TikTok» суд қарори бўлмасдан блокланган ва бу, унинг фикрича, қонунга зид ҳисобланади. Депутат мазкур платформа тадбиркорлар томонидан бизнесни тарғиб қилиш учун фаол қўлланилишини қайд этиб, ижтимоий тармоқ қачон қайта ишга туширилишини сўради.

Вақтинчалик чекловнинг сабаби

Алишер Эрбаевнинг айтишича, чеклов болаларни уларнинг соғлиғи, жисмоний, интеллектуал, руҳий, маънавий ва ахлоқий ривожланишига зарар етказувчи ахборотдан ҳимоя қилиш тўғрисидаги қонун асосида жорий этилган.

«Қонунда болалар орасида тарқатилиши тақиқланган ёки мақбул бўлмаган ахборотни чеклашни назарда тутувчи бир нечта нормалар мавжуд. Биз «TikTok» орқали болаларга салбий таъсир кўрсатиши мумкин бўлган контент тарқатилаётганини кўрмоқдамиз, шунинг учун вақтинчалик чеклов жорий этилган», – деди у.

 
«TikTok»ни очиш шарти

Унинг сўзларига кўра, муайян тақиқланган контентни аниқлаб, фақат шу материалларни блоклаш имконини берувчи махсус ускуналар сотиб олиниб, ишга туширилгач, платформага кириш қайта тикланади.

«Биз фақат нохуш контентни блоклай оладиган даражага етганимиздан кейин «TikTok» тўлиқ очилади», – деди Эрбаев.

Ўз навбатида, Дастан Бекешев алоҳида материалларни чеклаш тўғри ёндашув эканини, аммо бутун платформани блоклаш самарасизлигини таъкидлади. Унинг фикрича, шундай контент бошқа ижтимоий тармоқларда ҳам тарқалмоқда.

«Агар шу мантиққа амал қилинса, унда бутун интернетни ёпишга тўғри келади», – деди депутат.

Маълумот учун, «TikTok» Қирғизистонда 2024-йил апрел ойида расман блокланган. Жорий йил май ойида Креатив саноат парки, Креатив саноат ассоциацияси ва рақамли ҳамжамият вакиллари «TikTok»ни блокдан чиқаришни қўллаб-қувватлаш ташаббусини бошлаб, мамлакат президенти Садир Жапаровга амалдаги чекловларни қайта кўриб чиқиш илтимоси билан мурожаат қилган.