Россия санкцияларни бекор қилиш эвазига АҚШга 14 трлн долларлик лойиҳаларни таклиф қилди

Россия президенти махсус вакили, Россия тўғридан тўғри инвестициялар фонди (РФПИ) раҳбари Кирилл Дмитриевнинг ёзишича, агар Доналд Трамп маъмурияти санкцияларни бекор қилса, АҚШ бизнеси улкан иқтисодий имкониятларга эга бўлади. Унинг таъкидлашича, санкциялар америкалик компанияларга 300 млрд доллардан ортиқ зарар келтирган ва чекловларни олиб ташлаш АҚШ манфаатига мос келади.

Дмитриев бу баёнотни «The Economist» журналидаги мақолага муносабат сифатида билдирди. Нашр Кремл Вашингтонга 12 трлн долларлик лойиҳаларни таклиф қилгани ҳақида ёзган эди. Манбаларга кўра, гап Арктикада нефт ва газ қазиб олиш, нодир ер металлари, атом энергиясига асосланган дата-марказ ва Беринг бўғози остида туннел қуриш каби йирик ташаббуслар ҳақида бормоқда.

Мегалойиҳалар ва ҳисоб-китоб

«The Economist» маълумотига кўра, ўтган йил августда Владимир Путин ва Доналд Трамп учрашуви олдидан Россия Хавфсизлик кенгаши учун алоҳида таҳлилий ёзма тайёрланган. Унда Россия «арктик ва шимолий ресурслар хазинаси» сифатида тавсифланган ва «энг катта иқтисодий келишув» ғояси илгари сурилган.

Манбаларнинг айтишича, АҚШ томонини энг қизиқтирган жиҳат — жаҳон хомашё бозорларига таъсир кўрсатиши мумкин бўлган мегалойиҳаларда улуш олиш имконияти. Айни пайтда нашр ҳисоб-китобларига кўра, ҳатто Россия импорти 2021 йил даражасига қайтса ва АҚШ компаниялари унинг ярмини эгалласа ҳам, йиллик даромад $340 млрд атрофида бўлади.

Санкция ва хавф

Нашр таъкидлашича, 12–14 трлн долларлик кўрсаткичларга етиш учун бундай тушумлар ўн йиллаб сақланиши керак. Бу эса реал иқтисодий ҳисоб-китоблардан анча узоқ, деган баҳолар бор.

Шу билан бирга, таҳлилчилар фикрича, санкциялар бекор қилиниши Россия иқтисодиётини тиклашга хизмат қилиши мумкин. Бу эса геосиёсий хавфларни кучайтириши эҳтимолини ҳам кун тартибига олиб чиқмоқда.