Россияда меҳнат миграциясини назорат қилишнинг янги «ёпиқ» модели жорий этилади

Россияга борган ишчиларнинг ишламайдиган оила аъзоларининг мамлакатга бориши чекланади. Бу ҳақда Россия Ички ишлар вазирининг биринчи ўринбосари — Миграция хизмати бошлиғи Андрей Кикот Россия президенти Владимир Путин билан учрашувда маълум қилди.

2027-йил 1-январдан бошлаб мигрант ўз оиласининг ҳар бир ишламайдиган аъзоси учун давлатга қўшимча солиқ тўлайди. Иш берувчилар хорижликларни уй-жой ва иш жойигача олиб бориб-келиш транспорти билан таъминлаши шарт бўлади. Кикотнинг айтишича, меҳнат мигрантларини ташкил этилган ҳолда ишга жалб қилиш тизимини ислоҳ қилиш режалаштирилмоқда.

Унинг сўзларига кўра, ислоҳот уч босқичда амалга оширилади ва ҳар бир босқич икки йилга мўлжалланган.

«Бизда ёпиқ тизим бўлиши керак: уй — иш — уй», — дея тушунтирди у.

Меҳнат шартномаси тугаганидан сўнг мигрант худди шу тартибда ўз ватанига қайтиши керак бўлади.

«Янги тартиб бир вақтнинг ўзида меҳнат мигрантларининг қонуний ҳуқуқларини таъминлаши ва уларнинг Россияда бўлишини назорат қилишни кучайтириши керак», — дея қўшимча қилди Ички ишлар вазирлиги вакили.

Россия ҳукумати қарийб 200 минг нафар хорижликнинг мамлакатга киришини чеклади. Бундан ташқари, тахминан 800 минг киши миграция қонунчилигини бузган ва назорат остидаги шахслар реестрига киритилган.

2027-йилдан бошлаб вазирлик ноқонуний миграцияга қарши курашиш бўйича аналитик марказни ишга туширишни режалаштирмоқда. Ноқонуний мигрантларни аниқлаш учун нейрон тармоқлардан фойдаланилади. Марказни сунъий интеллект тизимлари билан жиҳозлаш ва унда чегара хизмати, миграция назорати, юзни аниқлаш камералари, иш берувчилар ҳамда давлат органларининг маълумотларини бирлаштириш режалаштирилган.

Россияга ҳар йили тахминан 9 миллион нафар хорижлик боради. Бир вақтнинг ўзида мамлакат ҳудудида 6–6,5 миллион киши бўлади. Шундан тахминан 3 миллион нафари меҳнат мигрантлари ҳисобланади.

Владимир Путиннинг таъкидлашича, ташкил этилган ва мақсадли ишга қабул қилиш тизимида нафақат иш берувчи ва Россиянинг манфаатлари, балки меҳнат мигрантларининг қонуний ҳуқуқлари ҳам ҳисобга олиниши керак.

У, шунингдек, меҳнат миграцияси масаласини ҳал қилишда ҳукумат учун биринчи навбатда Россия фуқаролари ва маҳаллий аҳолининг манфаатлари муҳим эканини таъкидлади.

Президентнинг айтишича, хорижликларни ишга олишнинг янги мақсадли тизими мигрантларнинг қонуний ҳуқуқларини ҳам таъминлайди.

«Қонунга кўра, иш берувчи — йирик ёки ўрта ҳажмдаги корхона бўлишидан қатъи назар — мигрантларни махсус ажратилган уй-жой билан таъминлаши, шунингдек уларни ишга олиб бориш ва ишдан уйига қайтариш учун транспорт ташкил қилиши шарт бўлади. Яъни, бизда уй — иш — уй тарзидаги ёпиқ тизим бўлади. Меҳнат шартномаси тугагач, мигрант худди шу тартибда ўз ватанига қайтади. Бу — маданиятли ва тартибли усул», — деди Путин.

Унинг қўшимча қилишича, меҳнат мигрантлари келадиган давлатлар раҳбарлари ҳам Россия мигрантларни кўчиб келишга олдиндан тайёрлаш жараёнида иштирок этишидан манфаатдор.

Шу сабабли Путин Миграция хизматига бу масала бўйича ҳукумат билан тегишли ишларни бошлашни топширди.