Россияликларнинг деярли чорак қисми Путинга ишонмайди — ВЦИОМ
Бу Россия-Украина уруши бошланганидан бери энг юқори кўрсаткичдир.
Сўровда қатнашган россияликларнинг 24,1 фоизи мамлакат президенти Владимир Путинга ишонмайди, респондентларнинг 23,3 фоизи унинг Россия президенти лавозимидаги ишини маъқулламайди. Бу ҳақда Бутунроссия жамоатчилик фикрини ўрганиш маркази (ВЦИОМ) томонидан эълон қилинган сўнгги маълумотларда келтирилган.
«Агентство» нашрининг қайд этишича, бу Россия-Украина уруши бошланганидан бери энг юқори кўрсаткичлардир.
Ўтган ҳафта билан солиштирганда, президент фаолиятини маъқуллаш даражаси 1,1 фоиз пунктга тушиб, 65,6 фоизни ташкил этган. Путинга бўлган ишонч даражаси ҳам бир фоиз пунктга пасайиб, 71 фоизга тушган.
ВЦИОМ янги маълумотларни икки соатлик кечикиш билан эълон қилди, бунга ОАВ эътибор қаратди. ВЦИОМ матбуот хизмати кечикиш «техник носозликлар» билан боғлиқлигини билдирди.
«Медуза»нинг Россия ҳукуматига содиқ ОАВлардан биридаги манбасига кўра, президент администрациясининг сиёсий блокидан нашрларда ВЦИОМ эмас, балки «Жамоатчилик фикри» жамғармаси (ФОМ) тақдим этган Путин рейтингига ҳавола қилиш ёки бу ҳақда умуман хабар бермаслик бўйича тавсия тушган.
ФОМнинг янги маълумотларига кўра, сўровда қатнашганларнинг 76 фоизи президент ўз лавозимида «яхшироқ» ишлаяпти деб ҳисоблайди, 74 фоизи эса унга ишонади.
ВЦИОМ кетма-кет етти ҳафта давомида Владимир Путин рейтинглари пасайишини қайд этмоқда. РФ президенти администрацияси билан ҳамкорлик қилувчи сиёсий технологнинг «Медуза»га айтишича, ҳокимият рейтинглари тушишига сабаб — «Telegram»нинг блокланиши ва мобил интернетга чекловлар қўйилиши, шунингдек, нархлар ошиши ва россияликларнинг урушдан чарчаганидир.
