Шавкат Мирзиёев Японияга боради
Ташриф неча кун давом этиши ва Ўзбекистон раҳбарининг сафар давомидаги кун тартиби айтилди.
Ўзбекистон Президенти Шавкат Мирзиёев Япония бош вазири Санаэ Такаичи таклифига биноан 18-20 декабр кунлари расмий ташриф билан ушбу мамлакатда бўлади ва «Марказий Осиё + Япония» биринчи саммитида иштирок этади.
Ташриф дастурига мувофиқ, Токио шаҳрида Япония императори Нарухито, бош вазир Санаэ Такаичи, Парламент раҳбарияти, ҳукумат аъзолари, сиёсий партиялар вакиллари ва етакчи университетлар ректорлари билан учрашувлар ва музокаралар ўтказиш режалаштирилган.
Кун тартибидан Ўзбекистон – Япония стратегик шериклик муносабатлари ва кўп қиррали ҳамкорлигини янада кенгайтириш ҳамда ривожлантириш масалалари ўрин олган.
Ишбилармонлик дастури доирасида Япониянинг йирик компаниялари ва молия институтлари раҳбарлари иштирокидаги учрашувлар ва тадбирлар ўтказилиши режалаштирилган. Савдо-иқтисодий ҳамкорликни кенгайтириш ҳамда инвестиция лойиҳаларини илгари суриш масалалари атрофлича муҳокама қилинади. Икки томонлама ҳужжатларнинг салмоқли тўплами қабул қилиниши кутилмоқда.
Ўзбекистон раҳбари шунингдек, «Марказий Осиё + Япония» мулоқоти давлат раҳбарларининг биринчи саммитида иштирок этади. Тадбир доирасида «яшил иқтисодиёт» ва барқарор тараққиёт, ўзаро боғлиқлик ва минтақавий шерикликни мустаҳкамлаш ҳамда инсон ресурсларини ривожлантириш каби устувор соҳаларда ҳамкорлик истиқболлари муҳокама қилинади.
Саммит якунлари бўйича Токио декларациясини қабул қилиш режалаштирилган.
