«Сиёсий ютуқ». Нега Ўзбекистон Европа иттифоқи санкцияларига дучор бўлмади?
Бугун Европа Комиссияси Тожикистон, Қирғизистон ва Қозоғистон банклари ҳам киритилган Россияга қарши санкцияларнинг 19-пакетини эълон қилди. Лекин Ўзбекистон банклари бу «қора рўйхат»да йўқ.
Бугун, 23 октябр куни Европа комиссияси Россияга қарши санкцияларнинг 19-пакетини тасдиқлади. Санкциялар рўйхатига ВТБ-Қозоғистон банки, шунингдек, Тожикистон, Қирғизистон ва Беларус банклари киритилган. Лекин Ўзбекистон банклари «қора рўйхати»га тушмади.
«Санкцион рўйхат жами 45 та компанияни қамраб олган. Унда ўзбек банклари ва компаниялари йўқлиги Ўзбекистоннинг Европа иттифоқи билан икки томонлама манфаатли ва чуқур ўйланган сиёсатининг ютуқларидан бири деб ҳисобласа бўлади», - дея ёзмоқда иқтисодчи-блогер Отабек Бакиров.
Санкциялар рўйхатига ВТБ-Қозоғистон банки, Беларусдаги ВТБ шўъба корхоналари ва Алфа-банк, Толубай банк, Евроосиё жамғарма банки (Қирғизистон), Душанбе Сити банк, Спитамен банк (Тожикистон), Тожикистон коммерсбанки ва Россиянинг бир қатор банклар киритилган.
Шунингдек, Россиянинг Истина кредит ташкилоти, Земский Банк, Альфа-банк, МТС банк ва Абсолют Банк'и, ВТБ ва Сбернинг Беларус ва Хитойдаги шўъбалари, Мир тўлов тизими, СБП ва Payeer тизими, А7А5 стейблкоини ҳам Европа Иттифоқи «қора рўйхати»дан жой олган.
«Бугун, Шавкат Мирзиёев Брюсселга учиб кетди. Эртага Ўзбекистон ҳамда ЕИ ўртасида Кенгайтирилган шериклик ва ҳамкорлик тўғрисидаги битим имзоланади. Ким билсин, балки Еврокомиссия «меҳмонни санкциялар билан кутиб олмайлик» дегандир», - дея ҳазиломуз қилиб ёзган журналст Лазиз Ҳамидов.
Маълумот учун, Ўзбекистон президенти Шавкат Мирзиёев Европа кенгаши президенти Антониу Кошта ва Европа комиссияси президенти Урсула фон дер Ляйеннинг таклифига биноан бугун, 23 октябр куни расмий ташриф билан Брюссел шаҳрига жўнаб кетди.
Давлат раҳбари Белгия пойтахтида Европа Иттифоқи етакчилари билан музокаралар ўтказади. Кўп қиррали муносабатларни янада ривожлантириш ва кенгайтириш масалалари кўриб чиқилади. Ўзбекистон ва ЕИ ўртасида Кенгайтирилган шериклик ва ҳамкорлик тўғрисидаги битим имзоланиши кўзда тутилган.
Бундан ташқари, белгияликлар қироли Филипп ҳамда Европанинг етакчи компаниялари ва молиявий институтларининг вакиллари билан учрашувлар режалаштирилган.
