Тожикистонда ноқонуний майнинг учун жавобгарлик кучайтирилди
Парламент электр энергиясидан ноқонуний фойдаланган майнерлар учун катта жарима ва қамоқ жазоларини жорий этди.
Тожикистон парламенти криптовалюта майнингида электр энергиясидан ноқонуний фойдаланиш учун жиноий жавобгарликни кучайтирувчи ўзгартиришларни маъқуллади. Янги тартиблар мамлакатда кузатилаётган энергия танқислиги ва электр узилишларини камайтиришга қаратилган.
Қабул қилинган ўзгартиришларга мувофиқ, Жиноят кодексига 253(2)-модда — «Виртуал актив ишлаб чиқариш мақсадида электр энергиясидан ноқонуний фойдаланиш» киритилмоқда.
Унга кўра, криптовалюта майнинги учун ўғирланган ёки рухсатсиз уланган электр энергиясидан фойдаланган шахсларга нисбатан маъмурий эмас, балки жиноий жазо қўлланилади.
Асосий қоидабузарлик учун 1650 АҚШ долларидан 4070 долларгача жарима белгиланган. Агар ҳолат олдиндан тил бириктирган гуруҳ томонидан содир этилса ёки миқдор катта бўлса, жазо 4125 доллардан 8250 долларгача жарима ёки икки йилдан беш йилгача озодликдан маҳрум этишни назарда тутади.
Айниқса, йирик миқдорда ва уюшган гуруҳлар томонидан электр энергиясини талон-торож қилиш беш йилдан саккиз йилгача озодликдан маҳрум этиш билан жазоланади. Қонун президент томонидан имзоланиб, расмий нашрларда эълон қилинганидан сўнг кучга киради.
Тожикистон Бош прокурори Ҳабибулло Воҳидзода майнинг фаолияти айрим ҳудудларда электр таъминотида узилишлар ва қўшимча жиноятларга сабаб бўлаётганини таъкидлади. Унинг маълумотига кўра, ноқонуний майнингдан етказилган умумий зарар 3,52 миллион АҚШ долларини ташкил этган.
Расмийлар айтишича, мамлакатда айниқса куз-қиш мавсумида энергия инқирози кучайиб, айрим ҳудудларда аҳолига кунига икки-тўрт соатгина электр бериляпти. Янги қонун электр тармоғига тушаётган босимни камайтириш ва ноқонуний майнингни чеклашга хизмат қилиши кутилмоқда.
Эслатиб ўтамиз, аввалроқ Туркманистон 2026 йилдан расман майнинг ва криптобиржаларни очиши ҳақида хабар берган эдик.
