Трамп грин-карта лотереясини вақтинча тўхтатди
АҚШдаги қотилликлардан сўнг маъмурият иммиграция сиёсатида кескин қарор қабул қилди.
АҚШ президенти Доналд Трамп грин-карта лотереяси дастурини вақтинча тўхтатишга қарор қилди. Бу ҳақда AP нашри хабар берди.
Энг муҳим сабаб сифатида Браун университети ва МИТ(Массачусетс технология институти)да содир этилган қонли ҳодисалар келтирилмоқда. Гумонланаётган шахс мамлакат ҳудудига айнан шу дастур орқали кириб келгани сабабли АҚШ грин-карта ўйнаш дастурини тўхтатиб туриш қарорига келган.
Ички хавфсизлик вазири Кристи Ноемнинг маълум қилишича, Трамп АҚШ Фуқаролик ва иммиграция хизматларига дастурни тўлиқ тўхтатиш юзасидан кўрсатма берган. Унинг таъкидлашича, гумонланувчи шахс мамлакатга кирмаслиги керак эди ва бу ҳолат жиддий хулосалар чиқаришни талаб қилади.
Расмийларга кўра, Португалия фуқароси Клаудио Невеш Валенте Браун университетида икки талабанинг ўлими, тўққиз кишининг яраланиши ҳамда МИТ профессори ўлдирилишида гумон қилинган. 48 ёшли Валенте ҳодисалардан сўнг ўз жонига қасд қилган ҳолда топилган.
АҚШ прокуратураси маълумотига кўра, Валенте 2017 йилда грин-карта лотереяси орқали доимий яшаш ҳуқуқини олган. Ушбу ҳолат дастур орқали келган шахслар текшируви етарли эмаслиги ҳақидаги баҳсларни янада кучайтирди.
Диверсификация визаси дастури ҳар йили АҚШда чет давлатлар фуқаролари учун 50 мингтагача грин-карта тақдим этади. 2025 йил учун қарийб 20 миллион киши ариза топширган, шулардан оиласи билан ҳисоблаганда 131 минг нафар чет давлат фуқаролари ғолиб сифатида танланган.
Мутахассислар бу қарор Конгресс томонидан жорий этилган дастурга дахл қилгани сабабли суд низоларига олиб келиши мумкинлигини таъкидламоқда. Трамп эса ушбу лотереяга аввалдан қарши бўлиб келган.
Эслатиб ўтамиз, аввалроқ АҚШга кириш учун виза чеклови ўрнатилган давлатлар рўйхати 39 тага етганлиги ҳақида хабар берган эдик.
