Трамп Кубани нефт ва молиядан маҳрум қилмоқчи

АҚШ президенти Доналд Трамп Куба Венесуэладан олиб келинган нефт ва молиявий ресурслардан маҳрум қилинганини маълум қилди. У Truth Social ижтимоий тармоғида «Кубага эндиликда нефт ҳам, пул ҳам келмайди — нўл» дея ёзиб, Ҳавана ҳокимиятини «жуда кеч бўлиб қолмасидан олдин келишувга бориш»га чақирди.

Трампнинг таъкидлашича, Куба йиллар давомида Венесуэладан нефт ва молиялаштириш олиб, эвазига унга «хавфсизлик хизматлари» кўрсатиб келган. «Бу ҳар доим шундай битим бўлган», — деди у. Президент сўзларига кўра, ҳозир Венесуэла АҚШнинг ўзи томонидан ҳимоя қилиняпти ва Кубанинг бу жараёндаги роли қолмаган.

АҚШ президенти аввалроқ ҳам «Куба қулашига яқин кўринади» дея баёнот берган эди. Унинг фикрича, орол давлатида мустақил даромад манбалари йўқ, иқтисодиёт деярли тўлиқ венесуэлалик нефтга боғлиқ бўлиб қолган. Шу сабабли, Венесуэлага нисбатан олиб борилаётган АҚШ сиёсати Кубага ҳам жиддий зарба бермоқда.

Кубага нисбатан эҳтимолий ҳарбий аралашув ҳақидаги саволга жавобан Трамп бундай чорани зарур деб ҳисобламаслигини билдирди. Унинг айтишича, мамлакатдаги вазият ҳарбий куч ишлатмасдан ҳам «ичдан емирилиш» босқичига кирган.

Шу билан бирга, Трамп ижтимоий тармоқ фойдаланувчиларидан бирининг «келажакда АҚШ давлат котиби Марко Рубио Куба президенти бўлиши мумкин» деган ҳазиломуз фикрини маъқуллаб, «менга ёқди, жуда яхши эшитилади» деб ёзди.

Бироқ Reuters манбаларига кўра, АҚШ разведка идоралари Кубадаги иқтисодий ва сиёсий вазиятни оғир деб баҳолаётган бўлса-да, орол давлатининг яқин фурсатда тўлиқ «қулаши» ҳақида аниқ хулоса чиқармаган. Разведка ҳисоботлари Трамп айтган сценарийни тўлиқ тасдиқламаётгани қайд этилган.