Трамп–Зеленский учрашуви: дастлабки баёнотлар
Флоридадаги Мар-а-Лаго қароргоҳида Доналд Трамп ва Володимир Зеленский учрашувидан сўнг, томонлар Украина бўйича келишув 95 фоизга яқин эканини маълум қилди.
АҚШ президенти Доналд Трамп Флоридадаги Мар-а-Лаго қароргоҳида Украина президенти Володимир Зеленский билан ўтказилган учрашувдан кейин журналистлар олдида чиқиш қилди. Трамп учрашувни «жуда самарали» деб атаб, томонлар кўплаб масалаларни муҳокама қилганини ва келишувга «жуда яқин» эканини билдирди. Унинг сўзларига кўра, аввал амалга ошмайди, деб ҳисобланган жиҳатлар бўйича ҳам илгарилаш мавжуд.
Зеленский эса 20 банддан иборат тинчлик режаси бўйича ишнинг асосий қисми келишиб олинганини таъкидлади. Унинг айтишича, ҳужжатнинг 90 фоизи бўйича келишув бор, хавфсизлик кафолатлари эса тўлиқ мувофиқлаштирилган. Томонлар музокараларни давом эттириб, қолган масалаларни яқин кунларда ҳал қилиш ниятида.
Трамп Донбасс масаласи энг оғир ва мураккаб йўналиш бўлиб қолаётганини билдирди. Унинг сўзларига кўра, келишувда ҳали бир ёки икки «оғриқли» масала очиқ қолган, бироқ умумий жараён қарийб 95 фоизга якунига етган. Президент аниқ фоизлар билан ишлашни ёқтирмаслигини айтган бўлса-да, келишувга яқинликни яна бир бор тасдиқлади.
Зеленский айрим бандлар бўйича референдум ўтказиш эҳтимолини истисно қилмади. Унинг таъкидлашича, Украина жамияти қарор қабул қилишда фаол иштирок этиши мумкин. Трамп эса, келишув масалалари референдум ёки парламент орқали ҳал этилишини, аҳоли эса урушни тўхтатиш тарафдори эканини билдирди. Унинг сўзларига кўра, украиналикларнинг катта қисми жангларни якунлашни истайди.
Шунингдек, Трамп Запорижжя атом электр станцияси масаласи Владимир Путин билан муҳокама қилинганини айтди. Унинг таъкидлашича, Россия томони станциянинг Украина учун ҳам очиқ бўлишини истайди. Трамп яқин ойларда янги ҳудудлар йўқотилиши хавфи борлигини айтиб, келишувни кечиктирмасликка чақирди.
АҚШ президенти зарурат бўлса, тинчлик йўлида Украинага боришга ва парламентда чиқиш қилишга тайёр эканини билдирди. У шунингдек, келишув бир неча ҳафта ичидаёқ амалга ошиши мумкинлигини истисно қилмади. Трамп Россия Украина тикланишида иштирок этишга тайёрлигини, Европа эса хавфсизлик кафолатларининг катта қисмини ўз зиммасига олишини таъкидлади. АҚШ томонидан эса махсус ишчи гуруҳ тузилиб, музокараларда фаол иштирок этиши маълум қилинди.
