Туркиядаги чет эллик келинлар рейтингида ўзбек қизлари 2-ўринда: 1-ўринда ким?
2025 йил якунига кўра, Туркияда турмуш қурган хорижлик келинлар орасида ўзбекистонлик аёллар сони юқори кўрсаткич қайд этиб, иккинчи ўринни эгаллади.
Туркия Статистика институти эълон қилган расмий маълумотларга кўра, ўтган йил давомида мамлакатда 28 646 нафар хорижлик келин ва 5 347 нафар хорижлик куйов никоҳдан ўтган. Бу рақамлар умумий никоҳлар таркибида аёллар улуши 5,2 фоизни, эркаклар улуши эса 1 фоизни ташкил этганини кўрсатади.
Хорижлик келинлар орасида сурияликлар 13,8 фоиз билан етакчилик қилган. Ўзбекистонлик аёллар эса 13,7 фоиз кўрсаткич билан жуда кичик фарқ билан иккинчи ўринни эгаллаган. 2025 йилда қарийб 3 924 нафар ўзбекистонлик аёл Туркия фуқаролари билан расмий оила қурган.
Хорижлик куёвлар орасида эса сурияликлар 20,9 фоиз билан биринчи ўринни эгаллаган. Кейинги поғоналарда Германия фуқаролари 18,8 фоиз, Афғонистон фуқаролари 5 фоиз кўрсаткич билан қайд этилган.
2024 йилда 3 509 нафар ўзбекистонлик аёл Туркия фуқароларига турмушга чиққан ва ўшанда ҳам улар хорижлик келинлар рейтингида иккинчи ўринни эгаллаган эди.
