Учинчи жаҳон уруши ёки ... : Петро Трампга янги стратегик танлов таклиф қилди
У Лотин Америкасини камситиш ва ресурсларини талон-тарож қилишга қаратилган сиёсат дунёни ваҳшийлик ва қуролли тўқнашувлар гирдобига улоқтиришини алоҳида урғулади.
Колумбия президенти Густаво Петро АҚШ раҳбари Доналд Трамп билан бўлиб ўтган телефон мулоқотидан сўнг Лотин Америкаси ва Вашингтон ўртасидаги муносабатларнинг келажаги борасида ўз қарашларини эълон қилди.
Унинг таъкидлашича, минтақани фақат нефт ва кўмир учун эксплуатация қилиш халқаро ҳуқуқ тамойилларининг бузилишига, варварликка ва ҳатто учинчи жаҳон урушига олиб келиши мумкин. Петро Трампни минтақанинг 1400 ГВтга тенг тоза энергия салоҳиятидан фойдаланишга чақириб, бу тинчлик ва демократия учун асос бўлишини қайд этди.
Давлат раҳбарининг ҳисоб-китобларига кўра, Жанубий Американинг қайта тикланувчи энергия манбалари АҚШнинг йиллик 840 ГВтлик энергия эҳтиёжини тўлиқ қоплаш имкониятига эга. Бу қадам нафақат иқтисодий алоқаларни мустаҳкамлайди, балки иқлим инқирозига қарши курашда ва ер юзида ҳаётни асраб қолишда инсоният тарихидаги энг катта ютуқ бўлиши мумкин.
Ушбу лойиҳаларни амалга ошириш учун Петро Қўшма Штатлар ихтиёридаги 500 миллиард доллар миқдоридаги инвестицияларни жалб қилиш ташаббусини илгари сурди.
Густаво Петро ўз чиқишида нефт қазиб олишга йўналтирилган анъанавий сиёсатнинг хавфларига алоҳида тўхталди. Унинг фикрича, Лотин Америкасини табиий ресурслар учун камситиш ва эксплуатация қилиш дунёдаги барқарорликка жиддий таҳдид солади ҳамда қайтариб бўлмас иқлим коллапсига сабаб бўлади. Президент бу ёндашувни глобал демократия ва инсон ҳуқуқлари тамойилларига зид деб баҳолаб, Вашингтонни янгича стратегик шерикликка чақирди ва бу режа тинчлик тамойилларига асосланганини айтди.
Икки давлат раҳбарлари ўртасидаги ушбу мулоқот Оқ уйда бўлиб ўтадиган расмий учрашув олдидан муҳим сиёсий қадам бўлди. Бунгача Доналд Трамп Колумбияга нисбатан Венесуэладаги каби сценарий қўлланилиши мумкинлиги ҳақида шаъма қилган эди. Петро эса бундай айбловларни илгари ҳам рад этиб, АҚШ маъмуриятини ўйламасдан қарор қабул қилмасликка ва минтақа давлатларининг суверенитетини ҳурмат қилишга чақирганди. Энди томонлар юзма-юз мулоқот қилишга келишиб олдилар.
