Украина НАТОдаги ҳарбийча фикрлашини ўзгартирмоқда

Украинадаги уруш НАТО ва Европа давлатларининг ҳарбий фикрлашига тубдан таъсир кўрсатди. Бу ҳақда Буюк Британиянинг Украинадаги элчиси Нил Кромптон Киев хавфсизлик форумидаги махсус сессияда сўзлаб ўтди. Унинг таъкидлашича, Европа давлатлари ўз мудофаа қобилиятини ошириш ва стратегик автономияни кучайтириш зарурлигини англаб етди.

Кромптон Европа мамлакатларида мудофаа сиёсати соҳасида «даврни белгилайдиган ўзгаришлар» кетаяпти, деб баҳолади. Германия ва бошқа ЕИ давлатларида армияга инвестициялар кескин оширилгани, Украина хавфсизлиги Европа хавфсизлигининг ажралмас қисми экани англанаётганини кўрсатади.

Элчининг фикрича, Европа АҚШ билан стратегик алоқаларни сақлаган ҳолда, Россиядан келаётган таҳдидларга тез ва мустақил жавоб бериш имкониятини яратиши керак.

Хавфсизлик кафолатлари

Нил Кромптон Британия Франция ва бошқа ҳамкорлар билан бирга Украина учун хавфсизлик кафолатларини мувофиқлаштираётганини таъкидлади. Бу жараён «кўнгиллилар коалицияси» доирасида амалга оширилмоқда ва у фақат санкциялар билан чекланиб қолмайди.

Унинг сўзларига кўра, гап қуролли кучларни модернизация қилиш, оддий армияларни кучайтириш ва ядровий тийиб туриш салоҳиятини қайта кўриб чиқиш ҳақида бормоқда. «Юз берган воқеалар Британияда ядровий тийиб туриш ва оддий ҳарбий қудратни тиклаш бўйича стратегик ёндашувни тубдан ўзгартирди», деди элчи.

Кромптон музокаралар масаласига ҳам тўхталиб, улар фақат Украина янги агрессияга қарши тезкор ва кучли жавоб бўлишига ишонч ҳосил қилган тақдирдагина имконли эканлигини қайд этди.

Уруш сабоқлари

Украинанинг ҳарбий тажрибаси НАТО учун муҳим манбага айланганини АҚШ генерали Дэвид Петреус ҳам таъкидлади. У Украинадаги уруш бутун дунё армиялари учун ўзгаришлар катализатори бўлганини айтди.

Петреус айниқса пилотсиз парвоз тизимлари, қўшинларни ташкил этиш ва инновацияларни жорий қилиш соҳасида Украина тажрибаси тез ўзлаштирилиши кераклигини қайд этди. У Украинада алоҳида пилотсиз парвоз тизимлари қўшинлари ташкил этилганини келажак урушлар модели сифатида баҳолади.