Украинада уруш тугашининг эҳтимолли санаси айтилди
АҚШ президентининг собиқ махсус вакилига кўра, баҳордан сўнг вазият ўзгариб, жангдаги устунлик Украина томонга ўтади.
Давосда айтилган баёнотларга кўра, Украинадаги уруш ҳал қилувчи босқичга яқинлашмоқда ва унинг якунланиши учун аниқ сана ҳам тилга олинмоқда.
АҚШ президентининг Украина масалалари бўйича собиқ махсус вакили Кит Келлог Украинадаги уруш жорий йил ёзидаёқ тугаши мумкинлигини билдирди. У бу ҳақда Давосда бўлиб ўтган «Украина: фронтдаги келажак» номли муҳокамада айтди.
«Главред» нашрининг ёзишича, Келлог уруш тугаши мумкин бўлган рамзий сана сифатида Украина Мустақиллик куни — 2026 йил 24 августни тилга олган.
«Агар Украина шу январ ва феваралдаги қиш ойларидан эсон-омон чиқиб олса март-апрел ойлари ташаббус улар томонга ўтади. Ёз фаслидаги Мустақиллик кунигача бу заминга тинчлик келади», — деди Келлог.
Келлог буни ҳарбий, сиёсий ва психологик омиллар йиғиндиси билан изоҳлади. Унинг фикрича, айнан баҳор уруш тақдирини ҳал қилувчи давр бўлади.
Баҳорда устунлик ўзгаради
Келлогнинг сўзларига кўра, ҳозирги пайтда фронтдаги вазият оғир бўлишига қарамай, Украина Қуролли кучлари рус қўшинларини тийиб турибди.
Шу билан бирга, Келлог Россия президенти Владимир Путиннинг урушдаги мақсадлари амалга ошмаганини таъкидлади. У Путиннинг ютуқларини «метрлар билан ўлчаши»ни айтиб, Россия қўшинлари ҳали Одессада ҳам, Киевда ҳам эмаслигини, ҳатто Донбассдан тўлиқ чиқиб кетмаганини қайд этди. Бу эса Москва учун жиддий ҳарбий ва стратегик муаммолар мавжудлигини кўрсатади.
Келлогнинг баёнотлари халқаро майдонда Украинага қўллаб-қувватлаш масаласи яна долзарблашган бир пайтда янгради. Давосдаги муҳокамаларда ҳам Ғарб давлатларининг диққати урушнинг узоқ давом этиши ва уни дипломатик йўл билан тугатиш имкониятларига қаратилди.
