Умрадаги фуқароларни қайтариш учун махсус рейслар ташкил қилинади

Умра сафаридаги Ўзбекистон фуқаролари махсус рейслар билан мамлакатга олиб келинади. Бу ҳақда «Uzbekistan Airways» матбуот хизмати маълум қилди.

Маълумотга кўра, мамлакатдаги барча авиакомпанияларга кейинги огоҳлантиришга қадар зиёратчиларни умра дастури асосида Саудия Арабистонига олиб боришни тўхтатиш топширилган. Ушбу чеклов Тошкент – Жидда – Тошкент йўналишидаги қатновларга ҳам татбиқ этилган.

Репатриация режаси

2026 йил 2 мартдан бошлаб «Uzbekistan Airways» томонидан Жидда – Тошкент йўналишида репатриация рейслари йўлга қўйилади. Улар орқали умра дастури асосида Саудия Арабистонига жўнаб кетган Ўзбекистон фуқаролари босқичма-босқич ватанга қайтарилади.

Авиакомпания рейслар жадвали ва ташкилий масалалар бўйича қўшимча ахборот алоҳида эълон қилинишини билдирган. Мазкур чора фуқаролар хавфсизлигини таъминлашга қаратилган.

Сафарларга чеклов

Аввалроқ Ўзбекистон мусулмонлари идораси Яқин Шарқдаги вазият сабабли Ўзбекистондан амалга ошириладиган Умра сафарлари вақтинча қолдирилганини маълум қилган.

Шунингдек, Ўзбекистон Ташқи ишлар вазирлиги фуқароларга Яқин Шарқ давлатларига сафарларни вақтинча режалаштирмасликни тавсия этган. Расмийлар вазият барқарорлашгунига қадар эҳтиёткорликка амал қилиш зарурлигини таъкидламоқда.