Европарламент АҚШ билан савдо келишувини музлатмоқчи

Европарламентнинг халқаро савдо қўмитаси раиси Бернд Ланге АҚШ билан тузилган савдо келишувини тасдиқлаш бўйича қонунчилик ишларини вақтинча тўхтатиш ниятида эканини билдирди. «Bloomberg» маълумотига кўра, бу таклиф душанба куни бўлиб ўтадиган фавқулодда йиғилишда муҳокамага қўйилади.

Лангенинг айтишича, қарорга АҚШ Олий суди ҳукмидан кейин юзага келган «божхона беқарорлиги» ва Доналд Трамп маъмурияти савдо сиёсатидаги ноаниқлик сабаб бўлган.

«Ҳеч ким энди буни тушуниб ета олмайди — фақат жавобсиз саволлар ва ЕИ ҳамда бошқа ҳамкорлар учун ўсиб бораётган ноаниқлик», — деб ёзди у ижтимоий тармоқларда.

У ратификацияни давом эттириш учун «тўлиқ ҳуқуқий баҳолаш ва АҚШ томонидан аниқ мажбуриятлар» зарурлигини таъкидлади.

Тернберри келишуви

Ўтган ёзда Доналд Трамп ва Европа комиссияси раиси Урсула фон дер Ляйен ўртасида имзоланган «Тернберри келишуви»га кўра, ЕИдан АҚШга экспорт қилинадиган аксарият товарларга 15 фоизлик бож жорий этилиши, бироқ АҚШ товарлари учун ЕИ бозорида тарифлар бекор қилиниши назарда тутилган. Шу билан бирга, АҚШ Европа пўлати ва алюминийcи импортига 50 фоизлик божни сақлаб қолган.

Мутахассислар ушбу келишувни мувозанатсиз деб баҳолаган. Европа парламенти март ойида ҳужжатни ратификация қилишни режалаштирган эди. Илгари ҳам жараён Трампнинг Гренландияни аннексия қилиш таҳдидлари ортидан вақтинча тўхтатилган.

Олий суд қарори

Жума куни АҚШ Олий суди Трампнинг 1977 йилги Халқаро фавқулодда иқтисодий ваколатлар тўғрисидаги қонунга таяниб «акс божлар» жорий этишини конституцияга зид деб топди. Шундан сўнг Трамп аввал 10 фоизлик глобал тариф эълон қилди, кейин эса уни 15 фоизгача оширишини билдирди.

Янги тарифлар 1974 йилги Савдо тўғрисидаги қонуннинг 122-бўлимига асосланиб жорий этилади ва 150 кунгача Конгресс розилигисиз амал қилиши мумкин. Ланге ушбу чоралар «Тернберри келишуви» шартларига зид эмасми, деган саволни ўртага ташлади.