Юлдуз Усмонованинг Ню-Йоркдаги концерти атрофида сиёсий можаро авж олмоқда
Ҳатто унинг Америка визасини бекор қилиш бўйича АҚШ Давлат котиби Марко Рубиога мурожаат йўлланган.
АҚШнинг Ню-Йорк шаҳрида Ўзбекистон халқ артисти Юлдуз Усмонованинг концертига қарши кампания бошланди. 9 май куни машҳур Брайтон-Бич ҳудудида ўтиши кутилган тадбир атрофида жиддий баҳс-мунозаралар авж олган.
Сиёсатчиларнинг эътирози
Бир гуруҳ маҳаллий сиёсатчилар хонанданинг саҳнага чиқишига кескин норозилик билдириб, концертни бекор қилишни талаб қилмоқда. Улар орасида Нассау округи раҳбари ва губернаторликка номзод Брюс Блейкман, шунингдек, Ню-Йорк штати Ассамблеяси аъзолари Майкл Новахов ва Алек Брук-Краснийлар бор.
Сиёсатчиларнинг таъкидлашича, бунга хонанданинг аввалроқ айтган антисемитик руҳдаги баёнотлари сабаб бўлган. Усмоновага ўз сўзларини оммавий равишда инкор этиш ва узр сўраш таклиф қилинган, бироқ Усмонова бу талабни рад этган.
Визани бекор қилиш талаби
Можаро нафақат концертни бекор қилиш, балки хонанданинг Америкага кириш ҳуқуқини чеклаш даражасига кўтарилди. Фаоллар АҚШ Давлат котиби Марко Рубио номига расмий мурожаат йўллаб, Юлдуз Усмоновага берилган барча турдаги визаларни бекор қилишни сўраган.
Бугун, 4 май куни, Ню-Йоркда мазкур масала бўйича махсус матбуот анжумани ўтказилиши кутилмоқда.
Ҳозирча хонанданинг вакиллари ёки концерт ташкилотчилари ушбу вазиятга нисбатан расмий муносабат билдиргани йўқ.
