9 ва 11-синф якуний имтиҳон фанлари расман эълон қилинди

Ўзбекистонда 9 ва 11-синф ўқувчилари учун 2026 йилги якуний имтиҳон фанлари рўйхати расман эълон қилинди.

9-синф битирувчилари

9-синф ўқувчилари тўртта фан бўйича якуний имтиҳон топширади. Улар:

Она тили ва адабиёт (ёки давлат тили),

Математика,

Ўзбекистон тарихи

Жисмоний тарбия фанлари. Ушбу фанлар базавий билимларни баҳолашга қаратилган.

11-синф битирувчилари

11-синф битирувчилари учун эса имтиҳон тизими икки қисмга бўлинган. Биринчи қисм — мажбурий фанлар бўлиб, уларга она тили ва адабиёт (ёки давлат тили), математика (асосий ёки чуқурлаштирилган даражада) ҳамда тарих киради. Бу фанлар барча битирувчилар учун мажбурий ҳисобланади.

Иккинчи қисм — танлов фанларидан иборат. Ўқувчилар она тили ва адабиёти, биология, физика, кимё, ҳуқуқ, география ва чет тили фанларидан иккитасини танлаб, имтиҳон топширади. Бу эса битирувчиларга ўз қизиқиши ва келажак касбига мос йўналишни танлаш имконини беради.

11-синф ўқувчилари жами бешта фан бўйича имтиҳон топширади — учта мажбурий ва иккита танлов фанидан. Бу тартиб таълим сифатини баҳолаш ва абитуриентларни кейинги босқичга тайёрлаш мақсадида жорий этилган.

Мазкур тартиб Ўзбекистон Республикаси Мактабгача ва мактаб таълими вазирининг 2026 йил 16 мартдаги 102-сонли буйруғи асосида тасдиқланган.