Аҳмад аш-Шаръа 1946 йилдан бери Оқ уйга ташриф буюрган биринчи Сурия раҳбари бўлди

АҚШ президенти Доналд Трамп душанба куни Оқ уйда суриялик мавқедоши Аҳмад аш-Шарани қабул қилмоқда.

Бу Сурия давлат раҳбарининг 1946 йилда Яқин Шарқ мамлакати Франциядан мустақилликка эришганидан кейин Оқ уйга илк ташрифи бўлиб, АҚШ Асадлар оиласи ҳукмронлик қилган ўн йилликлар давомида Сурияга нисбатан жорий этилган санкцияларни бекор қилганидан сўнг амалга ошмоқда

Аҳмад аш-Шаръа ўтган йилнинг декабр ойида Суриянинг собиқ диктатори Башар Асадни ағдарган кучларга раҳбарлик қилган ва кейинчалик мамлакат раҳбари этиб тайинланган

Трамп ва Аҳмад аш-Шаръа илк бор май ойида Саудия Арабистонида учрашган эди. Ўшанда АҚШ президенти Аҳмад аш-Шаръани «ёш, келишган йигит, бақувват одам, кучли ўтмишга, жуда кучли ўтмишга эга жангчи», - деб таърифлаган.

Бу собиқ президент Билл Клинтон Башарнинг отаси Ҳофиз Асад билан учрашган 2000 йилдан бери АҚШ ва Сурия ўртасидаги биринчи расмий учрашув ҳисобланади

Оқ уй матбуот котиби Кэролин Лэвиттнинг айтишича, душанбадаги ташриф «президентнинг тинчлик йўлида дунёнинг исталган нуқтасидаги шахслар билан учрашиш борасидаги дипломатик саъй-ҳаракатларининг бир қисмидир».

Трамп яқинда Аҳмад аш-Шаръани «ҳозирча жуда яхши ишлаётгани» ва АҚШ санкцияларни юмшатганидан бери «Сурия билан кўп ютуқларга эришилгани»ни айтган.

Санкцияларни бекор қилиш шартлари

Аҳмад аш-Шаръа АҚШга келишидан олдин БМТ Хавфсизлик Кенгаши Сурия президенти ва бошқа ҳукумат амалдорларига нисбатан санкцияларни бекор қилиш тўғрисида овоз берди. АҚШнинг БМТдаги элчиси Майк Валс бу ҳаракатни Асад қулаганидан сўнг Сурия янги даврга кирганининг кучли белгиси деб баҳолади

Аҳмад аш-Шаръа учрашувга ўз устуворликлари билан келмоқда. У Асад ҳукумати ва хавфсизлик кучлари томонидан инсон ҳуқуқларини бузганлик бўйича кенг тарқалган айбловлар туфайли Сурияга нисбатан қўлланилган санкциялар бутунлай бекор қилинишини истайди. Ҳозирда Сезар қонуни санкциялари Трамп томонидан тўхтатиб турилган бўлса-да, уларни бутунлай бекор қилиш учун Конгресс ҳаракати талаб этилади

Вариантлардан бири — Сенат Ташқи алоқалар қўмитасидаги етакчи демократ сенатор Жанна Шаҳиннинг ҳеч қандай шартларсиз санкцияларни бекор қилиш таклифи. Иккинчиси эса ҳар олти ойда қайта кўриб чиқиладиган санкцияларни бекор қилиш шартларини белгилашни таклиф қилаётган Трампнинг қаттиққўл иттифоқчиси сенатор Линдси Грэҳэм томонидан тайёрланган.