Angliyada 2009-yildan keyin tug‘ilganlarga sigaret sotish umrbod taqiqlanadi
Sigaret sotib olish uchun ruxsat etilgan yosh har yili bir yilga oshib boradi. Bu degani, mazkur avlod ulg‘aysa ham, qonuniy sotib olish yoshiga hech qachon yeta olmaydi.
Angliya Parlamenti hozirda 17 yosh va undan kichik bo‘lgan bolalarning umr bo‘yi sigaret sotib olishini to‘sib qo‘yadigan «Tamaki va elektron sigaretlar to‘g‘risida»gi qonun loyihasi bo‘yicha yakuniy kelishuvga erishdi. Qirollik tasdig‘idan so‘ng kuchga kiradigan ushbu qonunga ko‘ra, 2009 yil 1-yanvardan keyin tug‘ilgan bolalarning hayotlari davomida qonuniy ravishda tamaki va tamaki mahsulotlarini sotib olishlari taqiqlanadi.
Taqiq haqida
Yangi tartibga ko‘ra, hozirda 17 yosh va undan kichik bo‘lgan bolalar, ya’ni 2009 yil 1-yanvardan keyin tug‘ilganlar, hayotlari davomida qonuniy ravishda tamaki va tamaki mahsulotlarini sotib ololmaydilar. Qirollik tasdig‘idan so‘ng kuchga kiradigan qonun bilan Sog‘liqni saqlash vazirligi tamaki va nikotin mahsulotlarining qadoqlanishidan tortib, ta’mlarigacha bo‘lgan keng doirada tartibga solish vakolatiga ega bo‘ladi.
Mamlakatda oldini olish mumkin bo‘lgan o‘lim va kasalliklarning eng katta sabablaridan biri sifatida ko‘rsatilayotgan sigaret chekishga qarshi boshlangan ushbu safarbarlik jamoat joylaridagi cheklovlarni ham kengaytirmoqda. Elektron va oddiy sigaretlardan foydalanish bolalar bo‘lgan transport vositalarida, o‘yin maydonchalarida, maktab atrofida va shifoxona kirishlarida taqiqlanadi. Biroq barlar, sohillar va xususiy ochiq joylar hamda turar joylarning ichki qismi taqiq doirasidan tashqarida qoldirildi.
Muhokama
Sog‘liqni saqlash vaziri Baronessa Merron loyihaning parlamentdagi jarayoni yakunlangani munosabati bilan: «Bugun tushdan keyin ushbu loyihaning parlamentdagi sayohati nihoyasiga yetganini bildiraman. Bu inqilobiy qonun bo‘lib, tutunsiz avlodni yaratadi. Aslida, bu bir avloddagi eng katta sog‘liqni saqlash aralashuvidir va barcha hurmatli lordlarga bu qonun hayotlarni saqlab qolishini ayta olaman», — dedi.
Konservatorlarning sobiq vakili Lord Naysbi qonun chakana savdo sohasi bosh bo‘lgan ko‘plab qatlamlarni bezovta qilganini ta’kidlab: «Aslida bizga kerak bo‘lgan narsa — odamlarni sigaret chekishni boshlamaslikka qanday o‘rgatishni tushunishdir», — dedi.
Nodavlat tashkilotlar ham ushbu huquqiy tartibni mamlakat sog‘lig‘i kelajagi uchun burilish nuqtasi sifatida baholadilar. «Asthma + Lung UK» tashkilotidan Sara Slit qonunning qabul qilinishi aholi salomatligini himoya qilish yo‘lida katta imkoniyat ekanini bildirdi.
«Hukumat chekuvchilarni chekishni tashlash bo‘yicha keng qamrovli yordam bilan ta’minlashi va ularning chekkada qolib ketmasligini ta’minlashi kerak. Tamaki sanoati esa Birlashgan Qirollik bo‘ylab ushbu xizmatlarni moliyalashtirib, yetkazgan zararini soliq orqali qoplashi kerak», — dedi Slit.
