АҚШ Демократлари Трампни ҳокимиятдан четлатмоқчи
Майк Жонсоннинг таъкидлашича, АҚШ Демократлари Трампга қарши навбатдаги импичмент жараёнини бошлашни режалаштирмоқда.
Америка Қўшма Штатлари Конгресси Вакиллар палатаси спикери, республикачи Майк Жонсон Turning Point USA тадбиридаги чиқиши чоғида Демократик партиянинг режалари ҳақида муҳим баёнот берди. Агар демократлар 2026 йилда бўлиб ўтадиган оралиқ сайловлар натижасида Конгрессда кўпчилик ўринни қўлга киритса, улар зудлик билан Америка Қўшма Штатлари президенти Доналд Трампни лавозимидан четлатиш жараёнини бошлайди. Бу ҳақда АҚШ Конгресси Вакиллар палатаси спикери, республикачи Майк Жонсон Turning Point USA тадбиридаги чиқиши чоғида сўз очди.
Республикачи спикер бундай сценарий мамлакатда мутлақ тартибсизлик ва хаос келтириб чиқариши мумкинлигидан хавотир билдирди.
Майк Жонсон ўз нутқи давомида бўлажак сайловларда мамлакат тақдири ҳал бўлишини ва республикачилар Палатадаги назоратни қўлдан чиқармасликлари шартлигини таъкидлади. Унинг фикрича, "радикал сўллар" деб таърифланган демократлар нафақат Трампга ҳужум қилишни, балки республикачиларнинг асосий қадриятларини бутунлай йўқ қилишни мақсад қилган. Спикер бу жараённи тўхтатиш учун Америка халқини бирдамликка ва консерватив тамойилларни ҳимоя қилишга чақирди.
Шунингдек, Жонсон сентябр ойида вафот этган америкалик консерватив фаол Чарли Киркнинг ғояларини қўллаб-қувватлашни давом эттириш зарурлигини қайд этди. У Капитолий биносида Кирк хотирасига ҳайкал ўрнатиш тўғрисидаги қонун лойиҳасини илгари суриш ниятида эканини маълум қилди. Спикернинг таъкидлашича, ушбу фаол тарғиб қилган тамойиллар миллатни сақлаб қолишда муҳим аҳамиятга эга ва демократлар айнан шу мафкуравий асосларга таҳдид солмоқда.
Маълумот учун таъкидлаш жоизки, демократлар вакили Эл Грин аллақачон Трампга импичмент эълон қилиш тўғрисидаги резолюцияни Конгресс кўриб чиқиши учун киритган.
