АҚШ Конгрессига НАТОдан чиқиш бўйича қонун лойиҳаси киритилди

АҚШ Конгрессининг Қуйи палатаси депутати, республикачи Томас Масси мамлакатнинг НАТОдан чиқишини назарда тутувчи қонун лойиҳасини парламентга киритди. Ташаббус «Not A Trusted Organization Act» — «Ишончли бўлмаган ташкилот тўғрисида»ги қонун, деб номланган. Ҳужжатда таъкидланишича, НАТО совуқ уруш даври маҳсулоти бўлиб, у совет иттифоқига қарши туриш учун тузилган, аммо СССР 30 йил олдин тарқалиб кетганига қарамай, АҚШ ҳамон иқтисодий юкини кўтараётгани кўрсатилган.

Массининг таъкидлашича, НАТОда иштирок этиш АҚШ солиқ тўловчиларига триллионлаб долларга тушган, бу эса Конституцияда белгиланган ташқи сиёсат тамойилларига зид. «Америка дунё ҳимоячиси бўлиши шарт эмас, айниқса энг бой мамлакатлар ўз хавфсизлиги учун пул тўлашдан бош тортаётган вазиятда», — деди конгрессмен.

Қонун қабул қилинса, АҚШ президенти 30 кун ичида НАТОга расмий тарк этиш нияти ҳақида хабар бериши шарт бўлади. Шунингдек, мамлакат солиқ тўловчилари маблағларини НАТО бюджетига йўналтириш тақиқланади. Масси ташаббусини янги қонун лойиҳаси билан Сенатга республикачи Майк Ли ҳам киритди.

Президент Доналд Трамп бундан аввал ҳам НАТОдан чиқиш таҳдиди билан чиқиш қилган, айниқса аъзоларнинг мудофаа харажатларини етарлича оширмаётганлигини танқид қилган. Унинг босими остида шимолий алянс мамлакатлари 2035 йилга қадар мудофаа харажатларини ЯИМнинг 5 фоизига етказиш бўйича мажбурият олган.

Шу билан бирга, Жо Байден президентлиги даврида Конгресс ҳар қайси президентнинг НАТОдан чиқиш ваколатини чекловчи қонун қабул қилган, унинг ҳаммуаллифи ҳозирги давлат котиби Марко Рубио ҳисобланади. Бироқ Politico нашрининг таъкидлашича, Трамп ташқи сиёсат бўйича президент ваколатларидан фойдаланиб, бундай чекловларни четлаб ўтиш йўлларини излаши мумкин.

Трамп қабул қилган янги миллий хавфсизлик стратегиясида НАТОнинг «чекланмас кенгайиш» тамойилига қарши туриш зарурлиги қайд этилган ва АҚШ «бўйнида бутун дунё тартибини ушлаб туриш» мажбуриятидан воз кечишини билдирган.