Энди банк карталарини бир жойдан текшириш имкони пайдо бўлади

Бундан буён фуқаролар ўз номига расмийлаштирилган банк карталари ҳақидаги маълумотларни бир жойдан текшириши имкониятига эга бўлади. Бу фойдаланувчига қайси банкларда унинг номига карта расмийлаштирилганини электрон шаклда кўриш имконини беради.

Бунинг учун MyGov порталининг «Банк карталари» бўлимига кириш керак. Хизмат орқали фойдаланувчининг номига расмийлаштирилган банк карталари ҳақидаги маълумотлар кўрсатилади.

Янги картага ҳам онлайн буюртма бериш мумкин

Портал орқали мавжуд карталар ҳақидаги маълумотларни кўришдан ташқари, янги банк картасига ҳам онлайн буюртма бериш мумкин.

Бунинг учун MyGov’даги тегишли хизматга кириб, рўйхатда кўрсатилган банклардан бирини танлаш ва электрон ариза юбориш керак. Шундан сўнг картани чиқариш жараёни танланган банк томонидан амалга оширилади.

Картани чиқариш учун олинадиган тўлов миқдори ягона тариф асосида эмас, балки тегишли тижорат банки томонидан белгиланади.

Бу имконият нима беради?

Аввал фуқаро ўз номига қайси банк карталари расмийлаштирилганини аниқлаш учун тегишли банкларга мурожаат қилиши ёки банкларнинг турли иловаларидан фойдаланишига тўғри келиши мумкин эди. Янги хизмат эса бундай маълумотларни ягона портал орқали кўриш имконини беради.

Бу фуқаро турли вақтларда бир нечта банкда карта очган ҳолатларда қулай бўлиши мумкин. Фойдаланувчи ўз номига расмийлаштирилган карталар рўйхатини бир жойдан кўриб, қайси карталардан фойдаланаётгани ёки фойдаланмаётганини билиши мумкин.

Шунингдек, хизмат банк карталари билан боғлиқ маълумотларни назорат қилиш имконини беради. Фуқаро номидаги карталар ҳақидаги маълумотларни текшириб туриши мумкин.

Ҳозирда хизмат тест синов режимида ишламоқда ва фақат Ўзбекистон ҳудудида фаолият юритувчи тижорат банкларининг карталари учун амал қилади.

Камрон Ҳасанов